کراچی: شہر قائد میں شکار کی طرح شہریوں کو سڑک کنارے روک کر اب چالان نہیں ہوگا، کراچی پولیس نے اس سلسلے میں شہریوں کے حق میں بڑا فیصلہ کر لیا ہے۔
تفصیلات کے مطابق ایڈیشنل آئی جی کراچی غلام نبی میمن نے پہلے اجلاس میں پہلا بڑا فیصلہ کر لیا، شہر بھر میں اب صرف سیکشن آفیسرز کو ہی چالان کرنے کا اختیار ہوگا، ایڈیشنل آئی جی کراچی نے احکامات جاری کر دیے۔
فیصلے کے مطابق کراچی میں ماتحت عملہ اب کسی شہری کے چالان کرنے کا مجاز نہیں ہوگا، اسٹریٹ کرائم اور منشیات پر قابو پانے کے لیے بھی مؤثرحکمت عملی ترتیب دے دی گئی، غلام نبی میمن نے پولیس پیٹرولنگ بڑھانے کے لیے تمام متعلقہ افسران کو ہدایت جاری کر دی۔
مددگار وَن فائیو کی مجموعی کارکردگی پر ڈی آئی جی مقصود میمن نے بریفنگ دی، اے آئی جی نے ہدایات جاری کیں کہ گرفتار ملزمان کے خلاف درج مقدمات کی تفتیش میں بہتری لائی جائے، ملوث اہل کاروں کے خلاف سخت قانونی کارروائی اور محکمہ جاتی کارروائی کی جائے۔
غلام نبی میمن نے ایڈیشنل آئی جی کراچی کا عہدہ سنبھال لیا
اجلاس میں موٹر سائیکلوں کی چوری کی بڑھتی وارداتوں کی روک تھام اور سدِ باب کا معاملہ بھی اٹھا، اے آئی جی نے ایس ایس پی ای وی ایل سی کو مؤثر اقدامات کرنے کی ہدایت جاری کی۔
اجلاس میں بتایا گیا کہ جرائم کی سرپرستی میں ملوث اہل کاروں کی اسکروٹنی کا عمل جاری ہے، اجلاس میں بہترین انداز میں کام کرنے والے کرائم سین یونٹ کی صلاحیتوں کو مزید بہتر بنانے کا بھی فیصلہ کیا گیا۔
