اسلام آباد : ایرانی وزیر داخلہ ڈاکٹراحمد وحیدی پاکستان پہنچ گئے، دورے کے دوران ڈاکٹر احمد وحیدی وزیراعظم عمران خان اور وزیر داخلہ شیخ رشید سے ملاقاتیں کریں گے۔
تفصیلات کے مطابق ایران کے وزیر داخلہ ڈاکٹراحمد وحیدی 9رکنی وفدکےہمراہ پاکستان پہنچ گئے ، وزیر داخلہ شیخ رشید احمد نے پاکستان پہنچنے پر ایرانی ہم منصب کااستقبال کیا۔
سیکرٹری داخلہ یوسف نسیم کھوکھر سمیت دیگر حکام نے بھی معززمہمان کااستقبال کیا،دورے کے دوران ایرانی وزیر داخلہ ڈاکٹر احمد وحیدی آج وزیراعظم عمران خان سے ملاقات کریں گے۔
ایرانی وزیر داخلہ کی وفد کے ہمراہ وزیر داخلہ شیخ رشیداحمد سے ملاقات ہوگی ، جس میں پاک ایران بارڈر مینجمنٹ اور قیدیوں کے تبادلے سےمتعلق گفتگو کی جائے گی۔
یاد رہے گذشتہ ہفتے سعودی وزیرداخلہ عبدالعزیزبن سعودبن نائف نے پاکستان کا دورہ کیا تھا ، سعودی وزیر داخلہ پاکستانی ہم منصب شیخ رشید کی خصوصی دعوت پر پاکستان پہنچے تھے۔
دورے کے دوران سعودی وزیرداخلہ نے وزیراعظم عمران خان ، آرمی چیف جنرل قمر جاوید باجوہ اور وزیرداخلہ شیخ رشید سے ملاقاتیں کیں تھیں۔
