کراچی : جانوروں میں لمپی اسکن وائرس کی موجودگی کے انکشاف کے بعد مرغی کے گوشت کی قیمتیں آسمان پر پہنچ گئیں۔
تفصیلات کے مطابق مویشیوں میں جلدی بیماری پھیلنے کے بعد کراچی میں مرغی کے گوشت کی قیمت میں 200 روپے سے زائد کا اضافہ ہوا اور 570 روپے فی کلو فروخت ہو رہا ہے۔
کراچی میں زندہ مرغی کی قیمت 370 روپے فی کلو اور گوشت کی قیمت 570 روپے فی کلو ریکارڈ کی گئی۔
فروری کے مہینے میں زندہ مرغی کی قیمت 190 سے 210 روپے فی کلو جبکہ گوشت 350 سے 380 روپے میں فروخت ہوتا تھا۔
خیال رہے لمپی سکن ڈیزیز (ایل ایس ڈی) کی وبا کے پھیلاؤ کو روکنے کیلئے حکومت سندھ نے صوبے بھر میں مویشی منڈیاں بند کر دیں۔
سندھ حکومت کے لائیو سٹاک اور مویشی پالنے کے محکمے نے مویشی منڈیاں بند کرنے کا نوٹیفکیشن جاری کر دیا ، جس میں متاثرہ جانوروں کا گوشت نہ کھانے اور دودھ نہ پینے کا مشورہ دیا ہے۔
محکمہ لائیو سٹاک نے مویشی مالکان کو مشورہ دیا کہ وہ اپنے بیمار جانوروں کو صحت مند جانوروں سے الگ کریں اور جانوروں کومحفوظ رکھنے کیلئے مچھر مار اسپرے کا استعمال کریں۔
ماہرین کا کہنا ہے کہ یہ بیماری خطے کے لیے نئی ہے اس لیے اس کے خلاف کوئی ویکسین موجود نہیں ہے، جو اس کے خلاف استعمال کی جا سکے، اس بیماری سے متاثرہ جانوروں کو ہائی وے اور بھینس کالونی میں واقع کیٹل فارمز میں منتقل کر دیا گیا ہے۔
