ماسکو: روس نے جاپانی اعلان کے ردِ عمل میں کہا ہے کہ جاپان امریکا کی دوستی میں اپنے پاؤں پر کلہاڑی مار رہا ہے۔
تفصیلات کے مطابق جاپان نے روس کے مرکزی بینک کے اثاثے منجمد کرنے کا اعلان کیا تھا، جس پر روسی وزارت خارجہ نے کہا ہے کہ جاپان روس کے خلاف مغربی قیادت میں بینڈ ویگن میں شامل ہو کر اپنے قومی مفادات کو تباہ کر رہا ہے، جو اپنے پاؤں پر کلہاڑا مارنے کے مترادف ہے۔
روسی وزارت خارجہ کی ترجمان ماریہ زخاروف نے اسپوتنک ریڈیو پر ماسکو کے خلاف علاقائی دعوؤں کے بارے میں جاپانی حکام کے بیانات پر تبصرہ کرتے ہوئے کہا کہ بدقسمتی سے جاپان مغربی مرکزی دھارے میں بہت فعال طور پر شامل رہا ہے اور بغیر کسی شکایت کے تمام ہدایات پر عمل کرتا ہے۔
ترجمان نے کہا کہ جاپانی بظاہر یہ نہیں سمجھتے کہ ایسے اقدامات ان کے قومی مفادات کے حوالے سے کتنے تباہ کن ہیں، جاپانی روس مخالف قطار میں ویسے ہی کھڑے ہو گئے ہیں جیسا کہ ان سے کہا گیا تھا۔
جاپان کا روس کے خلاف بڑا اعلان
ان کا کہنا تھا جاپانی قیادت کافی عرصے سے روس کے ساتھ توازن برقرار رکھنے کی کوشش کر رہی تھی، لیکن اب امریکا دوستی میں اس نے خود اپنے پیروں پر کلہاڑی مارنے کا فیصلہ کیا ہے۔
واضح رہے کہ یوکرین پر حملے کے تناظر میں جاپان نے روس کے مرکزی بینک کے اثاثے منجمد کرنے کا اعلان کیا تھا، جاپان، ماسکو پر پابندیوں کو زیادہ مؤثر بنانے کی کوشش کر رہا ہے، اس سلسلے میں جاپانی حکومت نے روس کے مرکزی بینک کے ساتھ لین دین محدود کرنے کا فیصلہ کیا ہے۔
