اسلام آباد: پی ٹی آئی فارن فنڈنگ سے متعلق دائر متفرق درخواست پر الیکشن کمیشن نے اپنا فیصلہ سنادیا ہے۔
تفصیلات کے مطابق الیکشن کمیشن میں پی ٹی آئی فارن فنڈنگ کیس کی سماعت ہوئی، کیس کی سماعت کے موقع پر تمام فریقین پیش ہوئے، سماعت کے آغاز پر الیکشن کمیشن نے گزشتہ سماعت پر کیا گیا محفوظ فیصلہ سنادیا اور اکبر ایس بابر کو کیس سے الگ کرنے کی پی ٹی آئی کی درخواست مسترد کردی۔
معاون وکیل نے عدالت کو بتایا کہ انور منصور سندھ اور شاہ خاور لاہور ہائیکورٹ میں مصروف ہونے کے باعث آج پیش نہیں ہوسکتے، کل ہی درخواست دی تھی کہ آج کی تاریخ تبدیل کی جائے۔
معاون وکیل کا کہنا تھا کہ الیکشن کمیشن کا فیصلہ چیلنج کرینگے، مناسب ہوگا کمیشن دو ہفتے کا وقت دےتاکہ اپیل پر فیصلہ ہو سکے۔
یہ بھی پڑھیں: فارن فنڈنگ کیس : تحریک انصاف کی سماعت ملتوی کرنے کی استدعا مسترد
اس موقع پر ممبر بلوچستان شاہ محمد جتوئی نے کہا کہ اکبر بابر کے وکیل نے آج دلائل دینے ہیں، بار بار التوا مانگنا اچھی روایت نہیں، اسکروٹنی کمیٹی سے کئی سال بعد کیس آیا ہے اب فیصلہ ہونے دیں، اسکروٹنی کمیٹی سے کئی سال بعد کیس آیا ہے اب فیصلہ ہونے دیں۔
معاون وکیل پی ٹی آئی نے عدالت سے استدعا کی کہ اسکروٹنی کمیٹی رپورٹ پر جواب اکبر ایس بابرکو نہ دیا جائے اور اکبر ایس بابر کی حیثیت پر اعلیٰ عدلیہ کو پہلے فیصلہ کرنے دیا جائے۔
الیکشن کمیشن نے اکبر ایس بابر کے وکیل احمد احسن کو دلائل جاری رکھنے کی ہدایت کی اور معاون وکیل پی ٹی آئی کو مخاطب کرتے ہوئے کہا کہ اکبر بابر کے وکیل دلائل دینگے آپ نوٹ کرکے سینئر وکیل کو بتا دیں۔
