اسلام آباد: پیپلزپارٹی کے چیئرمین بلاول بھٹو زرداری کا کہنا ہے کہ ارکان اسمبلی کی زندگی، آزادی اور خاندان خطرے میں ہیں۔
اے آر وائی نیوز کے مطابق چیئرمین پیپلزپارٹی بلاول بھٹو نے ٹویٹر پر لکھا کہ ’ارکان قومی اسمبلی کو عدم اعتماد سے روکنے کے لیے سنگین دھمکیاں دی گئی ہیں، ہم ان کے تحفظ کے لیے ہر طرح کا راستہ اختیار کریں گے۔
اراکین قومی اسمبلی کو تشدد، گرفتاری اور عدم اعتماد کی تحریک میں حصہ لینے کی صورت میں سنگین نتائج کی دھمکی دی گئی، عوامی نمائندوں کی زندگیاں، آزادی اور خاندان خطرے میں ہے، اراکین اسمبلی کو فسطائی حکومت سے اپنی حفاظت کے لئے ہر قسم کے اقدامات لینے کا حق ہے۔ 1/2 https://t.co/YDq7fZjd93
— BilawalBhuttoZardari (@BBhuttoZardari) March 17, 2022
بلاول بھٹو نے لکھا کہ پی پی اور پی ڈی ایم ان ارکان اسمبلی کی حفاظت کے لیے ہر ممکن کوشش کرے گی، انشا اللہ چند دوست عمران خان کے الزامات کا جواب دیں گے۔
انہوں نے کہا کہ اب ہم اپنے تمام کارڈ نہیں دکھائیں گے، حکومت ہمیں مشتعل نہ کرے۔
پی پی پی اور پی ڈی ایم اراکین کی حفاظت کیلئے ہرممکن اقدام کرینگے، ہم اپنے تمام پتے ظاہرنہیں کرینگے، انشاء اللہ کچھ دوست عمران خان کےالزامات کے جواب دیں گے، آئندہ دنوں میں مزیدبھی سامنے آئیں گے، او آئی سی کانفرنس کی وجہ سے ہم اسلام آباد میں انارکی نہیں چاہتے، حکومت ہمیں نہ اکسائے2 https://t.co/5RIxdmarzO
— BilawalBhuttoZardari (@BBhuttoZardari) March 17, 2022
چیئرمین پیپلزپارٹی نے مزید کہا کہ او آئی سی کانفرنس کے احترام میں ہم اسلام آباد میں انتشار نہیں چاہتے ہیں۔
مزید پڑھیں: وزیراعظم کے دعوے کی تصدیق، سندھ ہاؤس میں چھپے ارکان اسمبلی سامنے آگئے
واضح رہے کہ تحریک عدم اعتماد سے قبل سندھ ہاؤس میں چھپے پی ٹی آئی کے ارکان اسمبلی سامنے آگئے جن میں خواتین بھی شامل ہیں، راجا ریاض، نواب شیرو سیر، نور عالم خان، باسط بخاری سمیت 27 ارکان کی جانب سے سندھ ہاؤس میں پناہ لی گئی ہے۔
رکن اسمبلی راجہ ریاض نے دعویٰ کیا تھا کہ دو درجن سے زائد ارکان ہمارے ساتھ ہیں، عمران خان پارلیمانی پارٹی کا اجلاس بلائیں سب پتا چل جائے گا۔
باسط بخاری کا کہنا تھا کہ وفاقی وزرا ہم پر تہمت لگارہے ہیں، میں نے آزاد حیثیت سے الیکشن جیتا اور کوئی وزارت نہیں مانگی تھی۔
