اسلام آباد : وفاقی وزیر اطلاعات فواد چوہدری نے منحرف ارکان کو خبردار کیا ہے کہ پارٹی چھوڑنے والے اراکین کیخلاف کارروائی ہوگی اور نااہلی بھی تاحیات ہوگی۔
تفصیلات کے مطابق وفاقی وزیر اطلاعات فواد چوہدری نے منحرف ارکین کے حوالے سے کہا ہے کہ ایک پارٹی چھوڑنے اور دوسری میں جانے کیلئے قانون موجود ہے، اسپیکر کو پارٹی سربراہ کے خط کے بعد رکن کا ووٹ شمار نہیں ہوگا۔
فواد چوہدری کا کہنا تھا کہ اراکین نے خود کہہ دیا ہے انہوں نے پارٹی چھوڑ دی ہے، ان اراکین کیخلاف کارروائی ہوگی ،نااہلی بھی تاحیات ہوگی۔
وفاقی وزیر نے کہا کہ وزیراعلیٰ سندھ نےغریب کے پیسے لوگوں کے ضمیر خریدنے کیلئے بھیجے، سندھ میں پینے کا پانی نہیں، صحت نظام کا برا حال ہے، سندھ کے حکمران خرید و فروخت میں لگے ہوئے ہیں۔
ان کا مزید کہنا تھا کہ حکومت کے پاس وسائل ہوتے ہیں اس کیلئے خرید و فروخت آسان ہے، بینظیر کیخلاف عدم اعتماد آئی تو وسائل کا استعمال کرکے ناکام بنائی گئی تھی۔
