نئی دہلی: بھارتی میڈیا میں اس وقت بالی ووڈ اداکاروں رنبیر کپور اور عالیہ بھٹ کی شادی کی خبریں گردش میں ہیں اور اس حوالے سے نئی نئی تفصیلات سامنے آرہی ہیں۔
انڈیا ٹو ڈے کی رپورٹ کے مطابق رنبیر کپور اور عالیہ بھٹ نے اپنے قریبی رشتہ داروں اور دوستوں کو رواں ماہ کی 13 سے 17 تاریخ تک ہر قسم کی مصروفیات سے فارغ ہونے کی ہدایت کر دی ہے۔
رپورٹ کے مطابق رنبیر کپور اور عالیہ بھٹ کی شادی 13 سے 17 اپریل کے درمیان کسی بھی دن ہو سکتی ہے اور مداحوں کو اس دن کا شدت سے انتظار ہے۔
اب حال ہی میں بھارتی میڈیا نے دعویٰ کیا ہے کہ انہوں نے شادی میں مدعو کیے جانے والے مہمانوں کی فہرست بھی حاصل کرلی ہے۔
مہمانوں میں فلم انڈسٹری کے بے شمار نام شامل ہیں جیسے سنجے لیلا بھنسالی، ورون دھون، شاہ رخ خان، کرن جوہر، زویا اختر، ایان مکھرجی، ارجن کپور، منیش ملہوترا، نیتو کپور، کرینہ کپور، کرشمہ کپور، سیف علی خان، مہیش بھٹ، مکیش بھٹ، رنویر سنگھ، دپیکا پڈوکون اور ادیتیہ چوپڑا۔
رپورٹس کے مطابق جوڑا رواں ماہ کے اختتام پر اپنی شادی کا گرینڈ ریسپشن دینے کا بھی ارادہ رکھتا ہے۔
