جامعہ کراچی میں دھماکے کی سی سی ٹی وی فوٹیج اے آر وائی نیوز نے حاصل کرلی جس میں دھماکے سے قبل کنفیوشس انسٹی ٹیوٹ کے قریب خاتون کو کھڑے دیکھا جاسکتا ہے۔
تفصیلات کے مطابق جامعہ کراچی میں دھماکے کی سی سی ٹی وی فوٹیج اے آر وائی نیوز نے حاصل کرلی ہے۔ فوٹیج میں دھماکے سے قبل خاتون کو جامعہ کراچی کنفیوشس انسٹی ٹیوٹ کے قریب گیٹ پر کھڑے دیکھا جاسکتا ہے۔ فوٹیج میں دکھایا گیا ہے کہ وین جیسے ہی دروازے کے قریب آتی ہے خاتون خود کو دھماکے سے اڑا لیتی ہے۔
اس حوالے سے کراچی پولیس چیف غلام نبی میمن کا کہنا ہے کہ کسی خاتون نے خودکش حملہ کیا یہ کہنا قبل ازوقت ہے، دھماکے میں 4 افراد ہلاک اور 4 زخمی ہوئے ہیں اور ہلاک شدگان میں 3 غیر ملکی شامل ہیں۔
غلام نبی میمن نے مزید کہا کہ دھماکے کی نوعیت کیا ہے، اس پر بات کرنے کے لئے وقت درکار ہے، ٹیکنیکل ٹیم تفتیش کررہی ہے،جوتفصیل آئی بتائیں گے۔
واضح رہے کہ جامعہ کراچی میں وین دھماکا ہوا ہے جس میں 3 چینی باشندوں سمیت 5 افراد ہلاک ہوئے ہیں۔
ڈی آئی جی ایسٹ کا اس حوالے سے کہنا تھا کہ دھماکا تخریب کاری کا نتیجہ ہے، یہ دھماکا آئی ای ڈی کا تھا، 3 سے 4 کلو بارودی مواد استعمال کیا گیا۔
پولیس حکام کے مطابق دھماکے میں چینی اساتذہ کی گاڑی کو نشانہ بنایا گیا، ایڈیشنل آئی جی کراچی نے بتایا کہ دھماکے میں 3 چینی باشندے ہلاک ہوئے ہیں، تینوں لاشیں اسپتال پہنچنے پر شناخت کی جا سکتی ہیں۔
مزید پڑھیں: جامعہ کراچی میں وین میں دھماکا، 3 چینی باشندوں سمیت 5 افراد ہلاک
وفاقی وزیر اطلاعات مریم اورنگزیب نے کہا ہے کہ وزیر اعظم نے بھی واقعے کی تفصیلات طلب کر لی ہیں۔ بیرسٹر مرتضیٰ وہاب کے مطابق دھماکا چینی لینگویج انسٹیٹیوٹ کی وین میں ہوا، قانون نافذ کرنے والے اداروں کے اہل کار مزید تفتیش کر رہے ہیں۔
