لندن: جو روٹ کے مستعفیٰ ہونے کے بعد آل راؤنڈر بین اسٹوکس نے انگلینڈ کرکٹ ٹیم کی قیادت سنبھالنے پر رضامندی ظاہر کردی ہے۔
غیر ملکی میڈیا رپورٹس کے مطابق انگلش کرکٹ بورڈ کے ڈائریکٹر روب کی سے بین اسٹوکس کی ملاقات ہوئی، جس میں انہوں نے اس خواہش کا اظہار کیا کہ میں جیمز اینڈرسن اور اسٹورٹ براڈ کی سینئر جوڑی کو واپس اسکواڈ کا حصہ بنانا چاہتا ہوں۔
واضح رہے کہ انگلش کرکٹ بورڈ (ای سی بی) نے اسٹورٹ براڈ اور جیمز اینڈرسن کو دورہ ویسٹ انڈیز اور ایشز سیریز میں ناقص کارکردگی کے باعث ڈراپ کردیا تھا۔
ادھر انگلینڈ اینڈ ویلز کرکٹ بورڈ نے نوکری کا اشتہار دیا ہے جس میں اس بات کی تصدیق کی گئی ہے کہ دو ہیڈ کوچز کی تقرری کی جائے گی، ایک ٹیسٹ کرکٹ کے لیے اور دوسرا محدود اوورز کے فارمیٹس میں انگلینڈ کی ٹیم کو درکار ہے۔
یہ بھی پڑھیں: مشتاق احمد کے مشوروں نے بٹلر کو بلندیوں پر پہنچا دیا
نوکری کے اشتہار میں کہا گیا ہے کہ نئے ہیڈ کوچز قومی سلیکشن پینل کے ساتھ اپنے متعلقہ فارمیٹ کے لیے ٹیم کے انتخاب میں مرکزی کردار ادا کریں گے۔
یاد رہے کہ انگلینڈ کے پاس اس سے قبل دو ہزار بارہ اور چودہ کے درمیان دو الگ الگ ہیڈ کوچز تھے، جن میں اینڈی فلاور ریڈ بال جبکہ ایشلے جائلز وائٹ بال سیریز میں ٹیم کی نمائندگی کررہے تھے۔
