ریاض: سعودی عرب میں فرجت پلیٹ فارم کے ذریعے قیدیوں کی رہائی کی سہولت جاری کردی گئی، فرجت عطیات جمع کرنے کی اسکیم ہے جس سے جرمانہ ادا نہ کرنے کے قابل قیدی فائدہ اٹھا سکتے ہیں۔
سعودی ویب سائٹ کے مطابق سعودی عرب میں محکمہ جیل خانہ جات کے ترجمان کرنل بندر الخرامی نے کہا ہے کہ فرجت پلیٹ فارم کے ذریعے قیدیوں کو واجب الادا رقم ادا کرکے رہائی کی جو سہولت دی جارہی ہے وہ غیر مشروط ہے۔
انہوں نے کہا کہ جو قیدی بھی یہ شرائط پوری کرے گا اس پر واجب تمام رقم ادا ہوگی، اس کے لیے ایسی کوئی شرط نہیں کہ قیدی کے ذمے کتنے لوگوں نے کتنے مطالبات رکھے ہیں۔
ترجمان کا کہنا تھا کہ جو قیدی فرجت پلیٹ فارم والی شرائط پوری کر رہا ہو اسے رہائی کی رعایت ملے گی، اس سلسلے میں ادا کی جانے والی رقم کی کوئی انتہائی حد نہیں ہے۔
کرنل بندر الخرامی نے کہا کہ مطلوبہ بل کو چیک کرنا ضروری ہے، اسے چیک کر کے ہی رقم ادا ہوگی۔ وجہ یہ ہے کہ سماجی رابطہ وسائل پر بہت سے ایسے بل ریکارڈ پر آرہے ہیں جو فرجت پلیٹ فارم پر درج نہیں ہیں۔
یاد رہے کہ سعودی وزارت داخلہ کی جانب سے قیدیوں کی رہائی اور واجب الادا رقم کی ادائیگی کے لیے فرجت کے نام سے عطیات جمع کرنے کی ایک اسکیم قائم کی گئی ہے۔ جیلوں میں قید ایسے افراد جو جرمانے کی ادائیگی سے محروم ہیں وہ اس پروگرام سے فائدہ اٹھا سکتے ہیں۔
اس اقدام کا مقصد ایک ایسا آسان اور محفوظ طریقہ فراہم کرنا ہے جس کے ذریعے غیر مجرمانہ اور مالی معاملات میں سزا یافتہ افراد کے ذمہ قرضوں کی ادائیگی کے لیے عطیات دیے جائیں۔
