نوابشاہ: سابق صدر اور شریک چیئرمین پاکستان پیپلز پارٹی آصف علی زرداری کا کہنا ہے کہ کہا جاتا ہے سندھ میں کوئی کام نہیں ہوتا، میں کہتا ہوں اگر کام نہیں ہوتا تو لوگ پاگل ہیں جو مجھے ووٹ دیتے ہیں۔
شریک چیئرمین پاکستان پیپلز پارٹی آصف علی زرداری نے نواب شاہ کے گاؤں لعل محمد بروہی میں جیالوں سے خطاب کرتے ہوئے کہا کہ پیپلز پارٹی کے ورکر میرے پاس امانت ہیں، اب یہ امانت بلاول کے حوالے کردی ہے، آپ لوگ 1970 سے پیپلز پارٹی کو ووٹ دے رہے ہیں، آپ کے بڑوں نے، آپ نے ہمیشہ پیپلز پارٹی کا ساتھ دیا۔
انہوں نے کہا کہ میں الیکشن کے دوران پولنگ کو چیک کرنے نکلا، تو دیکھا کہ مائیں، بہنیں سخت گرمی میں ووٹ دینے کیلئے لائنوں میں لگی ہوئی تھیں، سندھ کی ماؤں، بہنوں اور عوام سے دل سے پیار کرتا ہوں، عوام نے مجھے بہت پیار دیا، عوام سے محبت کا رشتہ ہے، یہ پیار کا رشتہ بھٹو صاحب کے دور سے چل رہا ہے، عوام نے مجھے بہت کچھ دیا ہمیشہ احسان مند رہوں گا۔
یہ بھی پڑھیں: اگلا صدر کون ہوگا؟ زرداری یا مولانا فضل الرحمان، بڑی پیش گوئی
سابق صدر نے کہا کہ دنیا والے سوال کرتے ہیں آپ کا کیا فائدہ ہے، میں نے کہا یہ میری دھرتی ہے ہمارے بڑے یہیں دفن ہیں، 300 سے 400 سال گزر گئے ہم اسی دھرتی کا اناج کھا رہے ہیں، میں خود کو بلوچ کہلواؤ یا کچھ اور مگر نہیں کہلواتا میں صرف سندھی ہوں۔
آصف زرداری نے کہا کہ مجھے کہا جاتا ہے سندھ میں کچھ نہیں ہے، میں پوچھتا ہوں کہ کیا لوگ پاگل ہیں جو مجھے ووٹ دیتے ہیں، ہم اگرکچھ کام نہیں کرتے تو لوگ ووٹ کیسے دیتے ہیں۔
