حیدر آباد: ٹرانسفارمر پھٹنے سے 3 افراد کی موت کے واقعے پر نیپرا نے حیسکو پر ایک کروڑ روپے کا جرمانہ کر دیا ہے۔
تفصیلات کے مطابق حیدر آباد کے علاقے اسلام آباد چوک پر ٹرانسفارمر پھٹنے کا واقعہ پیش آیا تھا، جس میں 3 افراد جاں بحق اور 4 زخمی ہو گئے تھے، نیپرا نے ہلاکتوں کی تحقیقات کے لیے 2 ممبران پر مشتمل کمیٹی بنا لی تھی۔
نیپرا اعلامیے کے مطابق تحقیقاتی ٹیم نے متاثرین کے بیانات قلم بند کیے، اور جائے وقوع سے شواہد بھی اکٹھے کیے، ٹیم نے حیسکو حکام سے بھی پوچھ گچھ کی، اور متاثرہ ٹرانسفارمر بنانے والی کمپنی کا بھی دورہ کیا۔
نیپرا اعلامیے میں کہا گیا ہے کہ تحقیقاتی ٹیم نے تفتیش مکمل کرنے کے بعد اتھارٹی کو رپورٹ پیش کی تھی، جس کے بعد اتھارٹی نے نیپرا ایکٹ کے تحت حیسکو کو شوکاز نوٹس جاری کیا اور سماعت کا موقع بھی دیا۔
حیدرآباد: ٹرانسفارمر پھٹنے سے ہلاکتیں، حیسکو پر بھاری جرمانہ عائد
نیپرا نے پایا کہ حیسکو ضابطہ اخلاق اور حفاظتی معیار سے متعلق قانونی ذمہ داریاں سر انجام دینے میں ناکام رہا، جس پر اتھارٹی نے حیسکو کو سوگوار خاندانوں کو 35 لاکھ فی کس معاوضہ اداکرنے کی ہدایت کی۔
اعلامیے کے مطابق معاوضے کی تفصیلات اتھارٹی کے ساتھ شیئر کرنے کی جائیں گی، اتھارٹی کے حکم پر حیسکو سوگوار خاندانوں کے ایک ایک فرد کو ملازمت بھی دے گی۔
