کراچی: شہر قائد کا علاقہ ضلع کورنگی جرائم پیشہ عناصر کا گڑھ بن گیا ہے، ایک اور ہول ناک واردات میں لٹیروں نے دن دہاڑے راہ گیر کو تشدد کا نشانہ بناتے ہوئے لوٹ لیا۔
تفصیلات کے مطابق کراچی کے علاقے مہران ٹاؤن میں اسٹریٹ کرائم کی افسوسناک واردات ہوئی ہے، 3 مسلح لٹیروں نے شہری کو بدترین تشدد کا نشانہ بنایا اور مزاحمت پر گولی چلا دی۔
اس واقعے کی سی سی ٹی وی اور موبائل فوٹیجز میں دیکھا جا سکتا ہے کہ لٹیرے کتنی بے خوفی سے دن دہاڑے واردات کر رہے ہیں، شہری اپنے پرس کے حصول کے لیے جدوجہد کرتا رہا لیکن لٹیرے اسے مسلسل دھمکاتے رہے۔
سی سی ٹی وی فوٹیج کے مطابق ایک شہری سڑک پر جا رہا تھا کہ ایک موٹر سائیکل نے آ کر اسے ٹکر مار کر زمین پر گرا دیا، جب کہ دوسری موٹر سائیکل نے اس کا راستہ روک لیا، شہری کی مزاحمت پر لٹیروں نے اس پر تشدد شروع کر دیا۔
ایک لٹیرا شہری کی جیب سے پیسے اور موبائل فون نکالنے کی کوشش کرتا رہا، مزاحمت پر شہری کو مار مار کر ادھ موا کر دیا، جب لٹیرے واپس جانے لگے تو شہری پھر کھڑا ہوا اور اپنا پرس واپس مانگا۔
موبائل فوٹیج میں شہری کو سنا جا سکتا ہے، جو بار بار اپنا پرس واپس مانگ رہا ہے، جب کہ اس دوران لٹیرا اسے گولی مارنے کی دھمکی دیتا رہا، آخر کار پستول پکڑے ملزم نے شہری پر گولی چلا دی، اور واردات کے بعد تینوں بہ آسانی فرار ہونے میں کامیاب ہو گئے۔
