ہرنائی : دہشت گردوں کی جانب سے مزدوروں کے کیمپ پر حملے کے نتیجے میں تین مزدور جاں بحق اور چار زخمی ہو گئے جبکہ سات لاپتہ ہیں۔
تفصیلات کے مطابق بلوچستان کے ضلع ہرنائی میں مزدوروں کے کیمپ پر دہشت گردوں نے حملہ کردیا، دہشت گردوں کی فائرنگ سے تین مزدور جاں بحق اور چار زخمی ہو گئے جبکہ سات کے لاپتہ ہونے کی اطلاعات ہے۔
حملہ آوروں نے مزدوروں کے کیمپ کو آگ لگا دی اور موقع پر موجود گاڑیوں اور مشینری کو تباہ کر دیا۔
سکیورٹی فورسز نے علاقے کو گھیرے میں لے کر سرچ آپریشن شروع کر دیا ہے۔
وزیر اعلیٰ بلوچستان عبد القدوس بزنجو نے حملے کی شدید مذمت کرتے ہوئے واقعے کی رپورٹ طلب کرلی اور کہا دہشت گرد اپنے مذموم عزائم میں کامیاب نہیں ہوں گے اور حملہ آور جلد قانون کے شکنجے میں ہوں گے۔
عبد القدوس بزنجو نے محکمہ صحت کے حکام کو ہدایت کی کہ زخمی مزدوروں کو بہتر طبی سہولیات فراہم کی جائیں۔
