واشنگٹن : امریکی معیشت ان دنوں بحران کا شکار ہے، کورونا کے بعد یوکرین جنگ نے سپرپاور کو معاشی طور پر پریشانی میں مبتلا کر رکھا ہے، خاص کر پیٹرول کے داموں کے سبب یہاں مہنگائی بڑھتی جا رہی ہے۔
اس سلسلے میں مغربی ذرائع ابلاغ نے دعویٰ کیا ہے کہ بدترین حالات کے پیش نظرامریکہ ٹوٹنے کے دھانے پر پہنچ چکا ہے، امریکہ کے بڑے شہروں میں گزشتہ برسوں کی نسبت جرائم اور قتل و غارت گری میں بے پناہ اضافہ ہوا ہے۔
برطانوی اخبار ڈیلی ٹیلی گراف نے امریکہ میں بڑھتی ہوئی مہنگائی کی جانب اشارہ کرتے ہوئے کہا ہے کہ امریکہ سقوط کے دھانے پر ہے اور اسے شدید اقتصادی بحران نے اپنی لپیٹ میں لے لیا ہے اور اس ملک کی تاریخ میں ایندھن اور دیگر مصنوعات کی اتنی قیمتیں نہیں بڑھیں تھیں جتنی اب بڑھی ہیں۔
ڈیلی ٹیلی گراف نے اپنی رپورٹ میں لکھا ہے کہ جو بائیڈن کے اقتدار سنبھالنے کے وقت سے اب تک جنوبی امریکہ کی سرحد سے 20 لاکھ غیر قانونی مہاجرین ملک میں آئے اور امریکہ کے بڑے شہروں میں گزشتہ برسوں کی نسبت جرائم اور قتل و غارتگری میں بے پناہ اضافہ ہوا ہے۔
امریکہ کی ریئل کلیر پولیٹکس نامی ویب سائٹ کی جانب سے کرائے گئے ایک سروے کے مطابق ہر چار امریکیوں میں سے ایک کا کہنا ہے کہ امریکہ صحیح سمت کی جانب حرکت نہیں کر رہا اور حکومتی پالیسیاں درست نہیں ہیں۔
