کراچی : ایم کیوایم واپس آنا چاہے تو ہم اس کو خوش آمدید کہیں گے، صبح کا بھولا شام کولوٹ آئے تو اسے بھولا نہیں کہتے۔
سابق گورنر سندھ اور پی ٹی آئی کے رہنما عمران اسماعیل نے کہا ہے کہ متحدہ قومی موومنٹ کو جو سہانے خواب دکھائے گئے تھے وہ کبھی پورے نہیں ہوں گے۔
ایک فیصلہ ہے کہ ایم کیوایم پی ڈی ایم کو چھوڑ دے، دوسرا فیصلہ یہ ہے کہ وہ پی ڈی ایم کے ساتھ رہیں چاہے کچھ ملے نہ ملے، تیسرا راستہ یہ ہے کہ وہ ہمارے ساتھ آجائیں۔
انہوں نے کہا کہ ایم کیوایم پر ان کے اپنے لوگوں کا دباؤ ہے، ایم کیوایم والے کسی فون کےانتظارمیں نہ رہیں اپنا فیصلہ کریں۔
صحافیوں سے گفتگو کرتے ہوئے عمران اسماعیل کا کہنا تھا کہ کراچی کی سب سے بڑی جماعت تحریک انصاف ہے، سندھ میں شفاف انتخاب ہوں توپی ٹی آئی کو کوئی ہرانہیں سکتا۔
پی ٹی آئی رہنما نے کہا کہ حلقہ این اے240میں ووٹنگ کا ٹرن آؤٹ دیکھا تھا اب لوگ این اے245میں بھی ٹرن آؤٹ دیکھیں گے۔
عمران اسماعیل کا کہنا تھا کہ ہم پر لائے جانے کا الزام لگانے والے آج کہاں بیٹھے ہیں، آج الزام لگانے والے ٹوٹی پھوٹی حکومت چلا رہے ہیں، کیاجادوگری کریں گے یہ کہ ملک ٹھیک ہوجائے گا۔
انہوں نے کہا کہ موجودہ الیکشن کمیشن سے توقع ہے کہ فنڈنگ کیس میں جوسخت فیصلہ ہوگا وہ یہ کرے گا، موجودہ الیکشن کمیشن اور چیف الیکشن کمشنر جانبدار ہیں کیونکہ سندھ میں جو ہورہا ہے یہ اس کا نوٹس نہیں لے رہے
سابق گورنر نے کہا کہ پنجاب میں ویڈیو سامنے لانے کی دھمکیاں دی جارہی ہیں، کیا یہ وہ سب کچھ ہے جس کے لیے پاکستان بنایا گیا۔
آنے والےانتخابات میں عوام بےخوف ہوکر باہر نکلیں، ہم عوام کاووٹ چھیننے نہیں دیں گے، عوام کے ووٹ نہ دینے سے چوروں کو فرق پڑتا ہے، ٹرن آؤٹ کم ہو تو چوروں کو آسانی ہوجاتی ہے۔
