ہم سب کی خواہش ہوتی ہے کہ اپنی اور اپنے خاندان کی صحت کیلئے ہر وہ خوراک لازمی استعمال کریں جن میں غذائیت اور ذائقہ بھی ہو۔
اس کیلئے ہمیں فاسٹ فوڈ کے استعمال کو بہت کم کرنا ہوگا اور ساتھ ہی تلی ہوئی اشیاء اور کولڈ ڈرنکس سے اجتناب بھی بہت ضروری ہے۔
اس کے علاوہ اچھی صحت کیلئے ہرے پتوں والی سبزیاں اپنی مثال آپ ہیں، ان چیزوں کو اپنی روز مرہ زندگی میں شامل کرلیں اور کھانے کے معاملے میں خود کو پیچھے نہ رکھیں کیونکہ کھانا ایک مثبت عمل ہے جس سے آپ کے جسم کو توانائی حاصل ہوتی ہے۔
کبھی کبھار تھوڑا بہت من پسند اور اپنی مرضی کا کھانا بھی ٹھیک ہے مگراس بات کو یقینی بنائیں کہ اپنی خوراک میں توازن برقرار رکھیں اور ہمیشہ توانائی بخش کھانوں سے لطف اندوز ہوں۔
اگر آپ صحت مند کھانا کھاتے ہیں اور اپنی زندگی میں صحت بخش عادات کو شامل کرتے ہیں تو آپ خود کو ترو تازہ اور توانا محسوس کریں گے۔
یہ بات اگر آپ کے علم میں نہیں ہے کہ اپنی روزمرہ کی زندگی میں کھانے کی اچھی عادات کو کیسے شامل کریں یا آپ کو کیا کھانا چاہیے اور کیا نہیں تو پھر اس ویڈیو کو ضرور دیکھیں۔
اے آر وائی ڈیجیٹل کے پروگرام گڈ مارننگ پاکستان میں ماہر صحت کا کہنا تھا کہ اپنی غذا میں پروسیسڈ فوڈ ترک کردیں، پروسیسڈ فوڈ کی جگہ ہول فوڈ (وہ کھانے جن کو کسی کیمیکل یا مصنوعی طریقے سے تیار نہ کیا گیا ہو) کو ترجیح دیں۔
ایسی غذا کھانے کی کوشش کریں جن میں ضروری اجزاء جیسے پروٹین، فائبر، نشاستہ اور صحت مند چربی موجود ہوں، پیکٹ میں بند اور پروسیس شدہ کھانوں کے بجائے تازہ پھل اور سبزیاں کھانے کی کوشش کریں، فرق آپ کو خود نظر آئے گا۔
سلاد کا استعمال صحت کیلئے بے حد ضروری ہے۔
جب آپ صحت مند کھانے کا سوچتے ہیں تو سلاد آپ کے بہترین دوست ہیں۔ اپنے کھانے میں ہری سبزیاں یا سلاد شامل کرنے کی کوشش کریں۔ سلاد کھانے سے آپ کا پیٹ بھی بھرا رہے گا اور بھوک محسوس نہیں ہوگی۔
جب بھی باہر کھانے کا سوچیں تو صحت مند کھانا پسند کریں اور وہی کھائیں۔ ایسے کھانوں کا انتخاب کریں جو ہیلتھی فیٹس اور پروٹینز سے بھرپور ہوں۔
