لاہور : ق لیگ کے سربراہ چوہدری شجاعت نے دو ٹوک اعلان کیا ہے کہ چوہدری پرویزالہٰی ہی وزارت اعلیٰ کیلئے پارٹی کے امیدوار ہیں۔
تفصیلات کے مطابق پنجاب کی وزارت اعلیٰ کے انتخاب کے حوالے سے مسلم لیگ ق کے سربراہ چوہدری شجاعت حسین کا پالیسی بیان سامنے آ گیا۔
چوہدری شجاعت حسین نے دو ٹوک اعلان کیا ہے کہ چوہدری پرویزالہٰی ہی وزارت اعلیٰ کیلئےپارٹی کے امیدوار ہیں، جن کومینڈیٹ ملا حکومت کرنا ان کا ہی حق ہے، اس فکر میں نہ پڑیں کہ ایک دوسرے کو کیسے نیچےدکھانا ہے۔
مسلم لیگ ق کے سربراہ کا کہنا تھا کہ ایک بار نہیں 3،2بار پہلے بھی یہی بات کہہ چکا ہوں، کوئی لیٹر جاری نہیں کر رہا، کسی قسم کے لیٹرز جاری کرنے کا سوال ہی پیدا نہیں ہوتا۔
انھوں نے کہا کہ مجھے صفائی پیش کرنے کی کوئی ضرورت نہیں، ملکی مسائل کا حل اسی میں ہے کہ گنتی کے چکروں سے باہر نکلا جائے اور غریب آدمی کے مسائل کی طرف توجہ دی جائے۔
چوہدری شجاعت کا کہنا تھا کہ جو غریبوں کےمسائل حل میں کامیاب ہوگا حقیقی معنوں میں اسی کی گنتی پوری ہوجائے گی، جو منتخب ہوئے ہیں وہ عوام کی خدمت کریں۔
ق لیگی رہنما نے کہا کہ ملکی مسائل کاحل اسی میں ہے حکومت کا موقع ملے یا فوری الیکشن کی طرف جائیں، فوری انتخاب سے مراد فوری ہیں مہینوں میں نہیں۔
