کراچی: صوبہ سندھ کے دارالحکومت کراچی میں جعلی اسلحہ لائسنسز اور غیر قانونی اسلحے کی خرید و فروخت کا انکشاف ہوا ہے جس کے خلاف کارروائی کی جارہی ہے۔
تفصیلات کے مطابق کراچی شہر میں بڑے پیمانے پر جعلی اسلحہ لائسنسز اور اسلحے کی خرید و فروخت کا انکشاف ہوا ہے، ایڈیشنل آئی جی نے تحقیقات کے لیے کمیٹی بنا دی جس کا نوٹیفکیشن جاری کردیا گیا۔
تحقیقاتی ٹیم میں ایس پی بلدیہ فیضان اور ایس پی کیماڑی انویسٹی گیشن شامل ہیں، کمیٹی جعلی لائسنسز بنانے والے اور ان پر اسلحہ فروخت کرنے والے ڈیلرز کا تعین کرے گی۔
- Advertisement -
پولیس کا کہنا ہے کہ سال 2012 سے 2020 تک جاری اسلحہ لائسنسز کو چیک کیا جا رہا ہے، ہزاروں کی تعداد میں جعلی لائسنسز بنائے گئے اور اس پر اسلحہ فروخت کیا گیا۔
پولیس کے مطابق لائسنس ہولڈرز کو بلا کر جعلی لائسنس اور اسلحہ بھی ضبط کیا جا رہا ہے۔
