اسلام آباد: پاکستان تحریک انصاف اور جے یو آئی پاکستان میں طے شدہ اشتراک کار پر باضابطہ عمل کا آغاز ہو گیا۔
تفصیلات کے مطابق پی ٹی آئی کے دیگر ہم خیال سیاسی جماعتوں سے اشتراک کے سلسلے میں جمعیت علمائے اسلام پاکستان کے ساتھ طے شدہ اشتراک کار پر باضابطہ عمل کا آغاز کر دیا گیا۔
سابق اسپیکر قومی اسمبلی اسد قیصر کی قیادت میں 5 رکنی خصوصی کمیٹی کا اعلان کیا گیا ہے، جس میں پرویز خٹک، قاسم سوری، علی محمد خان اور ڈاکٹر افتخار درانی کمیٹی میں شامل کیے گئے ہیں۔
یہ کمیٹی پی ٹی آئی کے مرکزی سیکریٹری جنرل اسد عمر نے قائم کی ہے، جو تحریک انصاف اور جے یو آئی پاکستان میں مشترک سیاسی اہداف کے لیے کام کرے گی۔
کمیٹی عمران خان کے فلسفے اور پیغام کو دیگر ہم خیال قوتوں تک لے جانے کی حکمت عملی وضع کرے گی، اور سیاسی اشتراک عمل کو دیگر ہم خیال جماعتوں تک توسیع کی منصوبہ بندی بھی کرے گی۔
خصوصی کمیٹی اشتراک میں مزید وسعت و تقویت کی راہیں متعین کرے گی۔
