پشاور: 25ستمبرکو کے پی میں ہونے والا ضمنی الیکشن ملتوی کرنے کے الیکشن کمیشن فیصلے کیخلاف درخواست پر پشاور ہائی کورٹ نے نوٹس جاری کردیا۔
پشاور ہائی کورٹ میں ضمنی الیکشن ملتوی کرنے کیخلاف قومی اسمبلی کی درخواست کی سماعت ہوئی جس میں عدالت نے الیکشن کمیشن کو نوٹس جاری کردیا۔
دوران سماعت پشاور ہائی کورٹ نے الیکشن کمیشن سے 16ستمبر تک جواب طلب کرلیا اور درخواست گزار سے مزید تفصیلات دریافت کیں۔
وکیل درخواست گزار کا کہنا تھا کہ الیکشن کمیشن نے حالیہ سیلاب کی وجہ سے 25ستمبرکو ہونے والا ضمنی الیکشن ملتوی کیا ہے۔
وکیل نے عدالت کو بتایا کہ آئین کے مطابق قومی یا صوبائی اسمبلی کی نشست خالی ہونے کی صورت میں الیکشن کمیشن کو 60دن کے اندر لازمی انتخاب کرانا ہوتا ہے۔
عدالت نے استفسار کیا کہ الیکشن کمیشن نے انتخابات ملتوی کرنے کی کیا وجوہات بتائی ہیں؟ جس پر وکیل نے جواب دیا کہ الیکشن کمیشن نے سیلاب کا بتایا ہے کہ سیلاب کی وجہ سے معمولات زندگی متاثر ہوئی ہے۔
وکیل درخواست گزار کا کہنا تھا کہ چارسدہ میں سیلاب کے بعد اب صورتحال تیزی سے معمول پر آرہی ہے اور سیلاب متاثرہ لوگ بھی اپنے گھروں کو واپس جاچکے ہیں۔
واضح رہے کہ قومی اسمبلی کے حلقہ این اے 24چارسدہ سے منتخب رکن ایمل ولی خان نے الیکشن کمیشن کے ضمنی انتخابات ملتوی کرنے کےفیصلے کو ہائی کورٹ میں چیلنج کیا ہے، ایمل ولی خان پی ڈی ایم کے مشترکہ امیدوارہیں۔
