اسلام آباد : سیشن عدالت نے جلاؤگھیراؤ اور دفعہ 144کی خلاف ورزی کے کیسز میں چیئرمین پی ٹی آئی عمران خان کی عبوری ضمانت میں تیرہ اکتوبر تک توسیع کردی۔
تفصیلات کے مطابق سیشن عدالت اسلام آباد میں چیئرمین تحریک انصاف عمران خان کے خلاف جلاؤگھیراؤ،دفعہ 144 کی خلاف ورزی کے کیسز میں درج مقدمے میں عبوری درخواست ضمانت پر سماعت ہوئی۔
عمران خان کےوکیل بابر اعوان ڈسٹرکٹ اینڈ سیشن کورٹ میں پیش ہوئے جبکہ مقدمے کا تفتیشی افسر ریکارڈ سمیت عدالت میں پیش ہوا۔
بابر اعوان کی جانب سے عمران خان کی حاضری سے استثنیٰ کی درخواست دائر کی گئی ، جس میں کہا گیا کہ عمران خان لاہور میں ہونے کی وجہ سے پیش نہیں ہو سکتے۔
جس پر عدالت نے عمران خان کی عبوری درخواست ضمانت میں 13 اکتوبر تک توسیع کردی۔
گذشتہ سماعت میں بھی سیشن عدالت نے دفعہ 144 کے کیس میں پی ٹی آئی چیئرمین عمران خان سمیت دیگر رہنماؤں کی حاضری سے استثنیٰ کی درخواست منظور کی تھی۔
