واشنگٹن: سمندری طوفان ایان نے اب نیویارک اور واشنگٹن کا رخ کر لیا ہے۔
برطانوی نیوز چینل اسکائی نیوز کے مطابق فلوریڈا اور جنوبی کیرولائنا میں تباہی مچانے کے بعد طوفان ایان نے اب نیویارک اور واشنگٹن کا رخ کر لیا ہے۔
امریکا میں سمندری طوفان ایان کی تباہی کاریاں بدستور جاری ہیں، آندھی اور موسلا دھاربارش کے نتیجے میں حادثات میں ہلاکتیں 87 ہو گئی ہیں اور درجنوں افراد زخمی ہیں۔
آبی ریلا اپنے راستے میں آنے والی ہر چیز کو بہا لے گیا ہے، ہزاروں شہریوں کو گھر بار چھوڑ کر محفوظ مقام پر منتقل ہونا پڑا، گھر، گاڑیاں اور سڑکیں اب بھی پانی میں ڈوبی ہوئی ہیں۔
امریکا میں متاثرہ علاقوں میں مواصلاتی نظام تہس نہس ہو گیا، 74 لاکھ سے زائد افراد تاحال بجلی سے محروم ہیں۔
نیشنل ہریکین سینٹر نے کہا ہے کہ طوفان اب جنوبی ورجینیا میں پھیل رہا ہے، اور نیو یارک، نیو جرسی اور واشنگٹن ڈی سی سمیت مشرقی ساحل کے بڑے حصوں کے لیے اس ہفتے کے آخر میں ’غیر یقینی‘ حالات کی پیش گوئی کی گئی ہے۔
