نیوزی لینڈ میں کھیلی جا رہی سہ ملکی ٹی ٹوئنٹی سیریز کے آخری میچ میں بنگلہ دیش نے پاکستان کو جیت کے لیے 174 رنز کا ہدف دے دیا ہے۔
کرائسٹ چرچ میں بنگلہ دیش نے ٹاس جیت کر پہلے بیٹنگ کرنے فیصلہ کیا اور مقررہ 20 اوورز میں 6 وکٹوں کے نقصان پر 173 رنز بنائے۔
پہلی وکٹ جلد گرجانے کے باوجود بنگلہ دیشی بلے بازوں نے عمدہ کارکردگی کا مظاہرہ کیا، بنگلہ کپتان شکیب الحسن اور لیٹن داس نے شاندار نصف سنچریاں بنائیں۔
بنگلہ دیش کی پہلی وکٹ 7 کے مجموعی اسکور پر گری، وہ 4 رنز بنا کر نسیم شاہ کی بال پر شاداب خان کو کیچ دے کر پویلین لوٹ گئے، دوسرے اوپنر نجم الحسین بھی 12 کے انفرادی اسکور پر محمد وسیم کا شکار بن گئے۔
اس موقع پر لیٹن داس اور کپتان شکیب الحسن نے کریز پر آکر بیٹنگ کو سنبھالا دیا اور پاکستانی بولروں کو سنبھلنے کا موقع نہ دیا۔ لیٹن داس نے 69 اور شکیب الحسن نے 68 رنز بنائے، دونوں کے درمیان 88 رنز کی پارٹنر شپ ہوئی، عاطف حسین نے 11 رنز بنائے۔
پاکستان کی جانب سے نسیم شاہ اور محمد وسیم نے دو، دو جب کہ محمد نواز نے ایک کھلاڑی کو آؤٹ کیا۔
آج کے میچ میں قومی ٹیم میں ایک تبدیلی کی گئی ہے اور شاہنواز دھانی کی جگہ محمد حسنین کو شامل کیا گیا ہے۔
سیریز کا فائنل کل میزبان نیوزی لینڈ اور پاکستان کے مابین کھیلا جائے گا، بنگلہ دیش اب تک سیریز میں کوئی میچ نہیں جیت سکی ہے۔
