اسلام آباد : ممنوعہ فنڈنگ کیس میں اسلام آباد ہائی کورٹ نے ایف آئی اے کو قانون کے مطابق کارروائی کی ہدایت کر دی۔
تفصیلات کے مطابق اسلام آباد ہائی کورٹ میں ممنوعہ فنڈنگ کیسز میں ایف آئی اے انکوائری کیخلاف پی ٹی آئی کی درخواست پر سماعت ہوئی۔
پی ٹی آئی اورسینیٹر سیف اللہ نیازی کی درخواست پر جسٹس عامر فاروق نے سماعت کی ، درخواست گزاروں کی جانب سے بیرسٹر علی گوہر اور فیصل چوہدری عدالت میں پیش ہوئے۔
اس کے علاوہ وفاق کی جانب سے ایڈیشنل اٹارنی جنرل اور اسسٹنٹ اٹارنی جنرل جبکہ ایف آئی اے سائبر کرائم ونگ کے افسران بھی عدالت میں پیش ہوئے۔
ایڈیشنل اٹارنی جنرل نے بتایا کہ جو نئی درخواست دائر ہوئی اس کی ابھی کاپی نہیں ملی، جس پر جسٹس عامر فاروق نے ریمارکس دیئے کہ ایسے کیسز نہیں بنتے کہ بس صرف بندہ اٹھاؤ، بندہ اٹھانے سے کوئی تفتیش نہیں ہوتی۔
جسٹس عامر فاروق کا کہنا تھا کہ اس طرح کیسز کرتے ہیں تو پھر عدالتوں میں کیسز آتے ہیں، عدالت جب فیصلہ دیتی ہے تو عدالتوں پر الزام آجاتے ہیں۔
اسلام آباد ہائی کورٹ کے جسٹس نے مزید ریمارکس دیے کہ آج آپ حکومت میں ہے کل یہ ہونگے،پرسوں کوئی اور ہوگا، حکومتیں آتی جاتی ہیں مگر اداروں نے ادھر ہی رہنا ہے۔
ایڈیشنل اٹارنی منور اقبال دوگل نے تیاری کیلئے وقت مانگ لیا جبکہ بیرسٹر علی گوہر نے استدعا کی ایف آئی اے کو کسی قسم کی تادیبی کارروائی سے روکا جائے۔
عدالت نے ہدایت کی کہ ایف آئی اے قانون کے مطابق کارروائی کرے ، بعد ازاں کیس کی سماعت 27 اکتوبر تک کیلئے ملتوی کردی گئی۔
