اسلام آباد : سابق وزیراعظم عمران خان نے الیکشن کمیشن کا فیصلہ چیلنج کردیا ، جس میں الیکشن کمیشن کافیصلہ کالعدم قرار دینے کی استدعا کی گئی ہے۔
تفصیلات کے مطابق اسلام آباد ہائی کورٹ میں سابق وزیر عمران خان کی جانب سے الیکشن کمیشن کا فیصلہ چیلنج کردیا گیا۔
عمران خان کی جانب سے بیرسٹر علی ظفر نے درخواست دائر کی، درخواست میں الیکشن کمیشن کافیصلہ کالعدم قراردینے اور درخواست پر آج ہی سماعت کی استدعا کی گئی ہے۔
عمران خان کی درخواست پر رجسٹرارآفس کی جانب سے متعدداعتراضات عائد کردیئے گئے۔
رجسٹرارآفس نے کہا کہ عمران خان کے نااہلی فیصلے کی مصدقہ نقل درخواست کےساتھ منسلک نہیں اور عمران خان نے بائیومیٹرک تصدیق نہیں کرائی۔
گذشتہ روز پاکستان تحریک انصاف کے چیئرمین اور سابق وزیر اعظم عمران خان نے توشہ خانہ کیس میں اپنی نااہلی کے فیصلے کے خلاف عدالت جانے کا اعلان کیا تھا۔
توشہ خانہ کیس کا فیصلہ آنے کے بعد عمران خان نے ویڈیو بیان میں کہا تھا کہ الیکشن کمشنر نے سازش اور مافیا کا حصہ بن کر جانبدار فیصلہ کیا، جانبدار فیصلے کے خلاف آج پوری قوم سڑکوں پر نکلی، کل رات ہی ساتھیوں کو بتا دیا تھا کہ مجھے نااہل کرایا جائے گا۔
