وزیراعظم شہباز شریف نے پاکستان فلم انڈسٹری کو آگے بڑھانے کے لیے کمیٹی تشکیل دینے کا اعلان کردیا۔
اے آر وائی نیوز کے مطابق وزیراعظم شہباز شریف نے نیشنل امیچور شارٹ فلم فیسٹیول 2022 کی ایوارڈ تقریب سے خطاب کرتے ہوئے کہا کہ ایوارڈز کے لیے منتخب ہونے والوں نے آج کی تقریب کو چار چاند لگادیے ہیں۔
انہوں نے کہا کہ کامیاب ہونے والوں نے اپنی صلاحیتوں کا لوہا منوایا کامیاب ہونے والوں کے والدین اور اساتذہ مبارک باد کے مستحق ہیں۔
شہباز شریف نے کہا کہ ملکی فلم انڈسٹری میں بے شمار کام ہوا ایک وقت ایسا بھی آیا جب سنیما گھر بند ہوگئے تھے فلم انڈسٹری کو آگے بڑھانے کے لیے ایک کمیٹی تشکیل دی جائے گی۔
وزیراعظم نے کہا کہ ’آج ٹیکنالوجی کا دور ہے ہماری نوجوان نسل میں پاکستان کو صحیح معنوں میں بنانے کا جذبہ ہے، ملکی ترقی کی کُنجی نوجوانوں کے ہاتھوں میں ہے۔
انہوں نے کہا کہ 80 کی دہائی میں پاکستان کے ڈرامے اور فلمیں خطے پر چھائی ہوئی تھیں اور ایک وقت تھا جب بھارت میں بھی پاکستان کے ڈرامے دیکھے جاتے تھے۔
وزیراعظم نے مزید کہا کہ حکومت نوجوانوں کو وسائل فراہم کرے گی نوجوان وسائل پاکستان کی تقدیر بدلنے کے لیے استعمال کریں گے ہمارے نوجوان ہی ملک کا مستقبل ہیں انہوں نے ہی ملک کو ترقی کی راہ پر گامزن کرنا ہے۔
