کراچی: عدالت نے گلستان جوہر میں ایک شہری عامر حسین کو قتل کرنے والے شاہین فورس کے 3 اہل کاروں کا 5 روزہ جسمانی ریمانڈ منظور کر لیا۔
تفصیلات کے مطابق کراچی کے علاقے گلستان جوہر میں گزشتہ شام شاہین فورس کے اہل کاروں کی فائرنگ سے شہری کی ہلاکت کے کیس میں شارع فیصل پولیس نے گرفتار تین اہل کاروں کو انسداد دہشت گردی کی عدالت میں پیش کیا۔
تفتیشی افسر نے عدالت کو بتایا کہ ملزمان فیصل، شہریار اور ناصر شاہین فورس میں تعینات ہیں، اہل کاروں نے پولیس مقابلے میں ایک ڈاکو کو ہلاک کرنے کا دعویٰ کیا، لیکن ابتدائی تفتیش میں ان کا یہ دعویٰ غلط ثابت ہوا۔
’ہم عامر کی والدہ کی دوائیں لینے جا رہے تھے، بھانجی بھی ساتھ تھی، پولیس نے فائرنگ کر دی‘
تفتیشی افسر کے مطابق مقتول کے لواحقین کے بیان اور سی سی ٹی وی فوٹیج حاصل کر لیے گئے ہیں۔
پولیس نے عدالت سے ملزمان کے سی آر او اور تفتیش کے لیے جسمانی ریمانڈ کی استدعا کی، جس پر عدالت نے تینوں ملزمان کو 5 روزہ جسمانی ریمانڈ پر پولیس کے حوالے کر دیا۔
بچی کے سامنے جعلی مقابلے میں عامر کی ہلاکت، دل دہلا دینے والی فوٹیجز سامنے آ گئیں
عدالت نے حکم دیا کہ ملزمان کو 2 جنوری کو پیش کیا جائے، عدالت نے آئندہ سماعت پر پولیس سے پیش رفت رپورٹ بھی طلب کر لی۔
