اسلام آباد : الیکشن کمیشن نے اثاثوں کی تفصیلات جمع کرانے والے اراکین پارلیمنٹ کی فہرست جاری کردی ہے جس میں ملک کے نامور سیاست دانوں کے نام ہی نہیں ہیں۔
اس حوالے سے الیکشن کمیشن کی جانب سے جاری کردہ فہرست کے مطابق وفاقی وزیر مذہبی امور مفتی عبدالشکور نے اپنے گوشوارے جمع نہیں کرائے ہیں۔
مسلم لیگ ن کے شاہد خاقان عباسی، وفاقی وزیر خواجہ آصف، احسن اقبال، سردار ایاز صادق، محسن شاہنواز رانجھا، سینیٹر مصدق ملک اور اعظم نذیرتارڑ بھی گوشوارے جمع نہ کرانے والوں میں شامل ہیں۔
الیکشن کمیشن کے مطابق پیپلزپارٹی کے رکن قومی اسمبلی خورشید شاہ، سید علی موسیٰ گیلانی، سینیٹر مولابخش چانڈیو اور تاج حیدر نے بھی مالی گوشوارے جمع نہیں کرائے۔
چیئرمین کشمیر کمیٹی سید عبدالباسط سلطان بخاری اور پی اے پی کے رکن اسمبلی شاہ زین بگٹی بھی مالی گوشوارے جمع نہ کرانے والوں میں شامل ہیں۔
اس کے علاوہ پاکستان تحریک انصاف کے مرکزی رہنماؤں شاہ محمود قریشی، فواد چوہدری، شفقت محمود، علی نواز اعوان، اسد عمر، اسد قیصر،عمر ایوب، پی ٹی آئی سینیٹر محسن عزیز، اعظم سواتی، قاسم سوری و دیگر نے بھی تاحال گوشوارے جمع نہیں کرائے ہیں۔
الیکشن کمیشن کی فہرست کے مطابق وفاقی وزیر آغا حسن بلوچ، سردار اختر مینگل، وفاقی وزیر ساجد حسین طوری، جی ڈی اے کی ڈاکٹر فہمیدہ مرزا، سربراہ ایم کیوایم ڈاکٹرخالد مقبول صدیقی بھی گوشوارے جمع نہ کرانے والوں میں شامل ہیں۔
