سان فرانسسکو: پیغام رسانی کے لیے استعمال ہونے والی دنیا کی سب سے مقبول ایپلی کیشن واٹس ایپ کی جانب سے نت نئے فیچر متعارف کروائے جاتے ہیں جس کا مقصد دیگر ویب ایپلی کیشن پر سبقت لے جانا اور اپنے صارفین کو سہولت فراہم کرنا ہوتا ہے۔
میٹا کی ملکیت والی سوشل میسجنگ ایپلی کیشن واٹس ایپ نے ’میسج یور سیلف‘ فیچر متعارف کروایا ہے جس کی مدد سے آپ خود کو بھی میسج کرسکتے ہیں۔
’میسج یور سیلف‘ فیچر کو پہلے بیٹا ورژن میں متعارف کروایا گیا تھا لیکن اب یہ آئی او ایس اور اینڈرائیڈ صارفین کے لیے بھی دستیاب ہے۔
سیلف میسج فیچر کو استعمال کرنے کا طریقہ
اس فیچر کو استعمال کرنے کے لیے سب سے پہلے آپ کو اپنے اینڈرائیڈ یا آئی او ایس ڈیوائس پر واٹس ایپ کھولنا ہے۔
اس کے بعد چیٹ کے نئے آپشن پر کلک کریں جس کے بعد آپ کو اپنی میسج فہرست نظر آئے گی اس پر کلک کریں اور چیٹنگ شروع کردیں۔
اس فیچر سے آپ اپنے نوٹس یا دستاویزات کو محفوظ رکھنے کے لیے خود کو بھیج سکتے ہیں، علاوہ ازیں آپ خریداری کے لیے فہرست کو ’میسج یور سیلف‘ میں بھیج سکتے ہیں۔
واضح رہے کہ اس سے قبل کوئی صارف کو خود کو پیغام بھیجنے کے لیے روایتی میسج کا استعمال کرتا تھا یا پھر اس کام کے لیے واٹس ایپ میں ایک ایسا گروپ تخلیق کرنا پڑتا تھا جس میں وہ اکیلا ہو۔
یاد رہے کہ واٹس ایپ کی حریف ایپلی کیشن سِگنل ’نوٹ ٹو سیلف‘ نام سے یہ فیچر پہلے ہی متعارف کرواچکی ہے۔
