کراچی: متحدہ قومی موومنٹ پاکستان، پاک سرزمین پارٹی اور فاروق ستار ایک ہوگئے اور ساتھ الیکشن لڑنے کا اصولی فیصلہ کیا ہے۔
اے آر وائی نیوز کے مطابق ایم کیو ایم، پی ایس پی اور فاروق ستار نے ایک تنظیم، پرچم اور نشان کے ساتھ الیکشن لڑنے کا فیصلہ کیا ہے۔
ذرائع کا بتانا ہے کہ انضمام شدہ ایم کیو ایم کے کنوینئر خالد مقبول صدیقی ہوں گے، تنظیمی ساتھیوں کی سربراہی انیس قائمخانی کریں گے۔
ذرائع کا یہ بتانا ہے کہ 10 سے 12 رکنی کمیٹی پر بھی اتفاق ہوگیا جبکہ اراکین رابطہ کمیٹی سمیت دیگر اعلان کل مشترکہ پریس کانفرنس میں ہوں گے۔
واضح رہے کہ اس سے قبل گورنرسندھ کامران ٹیسوری کا کہنا تھا کہ اگر سارے دھڑے مل گئے تو سربراہ کون ہوگا، میری طرف سے کسی کو سربراہ بنانے کی بات نہیں کی گئی، نہ یہ مشورہ دیا کہ سینئر ڈپٹی کنونئیر کون بنے گا۔۔
ان کا کہنا تھا کہ سب کی آپسی لڑائی سے صوبے کے ترقیاتی کام 4 برس سے التوا کا شکار ہیں، ان سب سے ایک ہی بات کی کہ آپس میں اتفاق اور بھائی چارہ قائم کریں، میری کوشش صرف اتنی ہے کہ ان کو ایک جگہ بٹھا کر ان کے درمیان ذاتی اختلاف کو ختم کیا جائے۔
گورنر سندھ کا کہنا تھا کہ میں نے ان سب سے کہا ایک دوسرے کو ٹھیک کرنے کی بجائے صوبے اور شہر کو ٹھیک کریں۔
