کراچی : سندھ کے 16 اضلاع میں بلدیاتی انتخابات کے لیے صوبے کے مختلف شہری اور دیہی وارڈز میں ووٹنگ کا عمل مکمل ہوگیا جس کے بعد ووٹوں کی گنتی جاری ہے۔
پولنگ صبح 8 بجے شروع ہوئی جو بغیر کسی وقفے کے شام 5 بجے تک جاری رہی، الیکشن کمیشن کا کہنا ہے کہ پولنگ اسٹیشن کے اندر موجود افراد ہی ووٹ کاسٹ کرسکیں گے۔
اس حوالے سے ذرائع کا کہنا ہے کہ کراچی، حیدرآباد،بدین ،ٹھٹھہ، مٹیاری ،سجاول ،جامشورو میں پولنگ ہوئی۔ ٹنڈو محمد خان، ٹنڈوالہ یار میں بلدیاتی الیکشن کے دوسرے مرحلے میں پولنگ ہوئی۔
واضح رہے کہ کراچی ڈویژن میں چیئرمین، وائس چیئرمین اور جنرل ممبر کی نشست کیلئے 9ہزار 58امیدوار میدان میں تھے، بلدیاتی انتخابات کے انعقاد میں بے یقینی کے باعث سیاسی جماعتیں موثر انتخابی مہم نہ چلاسکیں، روایتی انتخابی گہما گہمی نہ ہونے پر بلدیاتی انتخابات سے متعلق ووٹرز تذبذب کا شکار رہے۔
کراچی کے ووٹرز کو متحرک اور متوجہ کرنے کیلئے سیاسی پارٹیوں نے کارنر میٹنگز اور گھر گھر مہم کے علاوہ سوشل میڈیا کا سہارا لیتے ہوئے انتخابی ماحول بنایا۔
