دنیا کو مہنگائی کا سامنا ہے ایسے میں مصر کی حکومت نے اپنے شہریوں کو رعایتی نرخوں پر سستی روٹی فراہم کرنے کا اعلان کیا ہے۔
عرب میڈیا کے مطابق مصر کی حکومت نے ملک میں بڑھتی مہنگائی پر قابو پانے کیلیے اپنے شہریوں کو سبسڈی سسٹم کے تحت رعایتی قیمت پر روٹی فراہم کرنے کا اعلان کیا ہے۔
رپورٹ کے مطابق مصر کے وزیر خوراک علی المصیلحی نے کہا ہے کہ ایسے مقامی شہری جو روٹی کی سبسڈی سسٹم کا حصہ نہیں ہیں انہیں بھی 90 گرام کی روٹی اصل لاگت پر فراہم کی جائے گی جس کے لیے انہیں پری پیڈ کارڈز جاری کیے جائیں گے۔
وزیر خوراک کا کہنا تھا کہ ابھی تک روٹی کی قیمت متعین نہیں کی گئی ہے تاہم یہ ایک مصری پونڈ سے کم ہی ہوگی اور اس کا آغاز جاری ہفتے میں ہی متوقع ہے۔
علی المصیلحی نے بتایا کہ حکومت کا گندم کی نئی فصل کی کٹائی کے بعد 40 لاکھ ٹن گندم خریدنےکا منصوبہ ہے جب کہ گزشتہ سال 4.2 ملین ٹن گندم خریدی تھی۔
واضح رہے کہ مصر نے عالمی مالیاتی فنڈ سے 3 ارب ڈالر کا امداد پیکیج حال ہی میں حاصل کیا ہے۔
اس ملک کی مجموعی آبادی 104 ملین ہے جب کہ حکومت پہلے ہی 70 ملین سے زیادہ شہریوں کو سبسڈی روٹی فراہم کر رہی ہے۔
