الیکشن کمیشن نے قومی اسمبلی کے سات حلقوں پرعمران خان کی کامیابی کا نوٹیفکیشن جاری کردیا۔
تفصیلات کے مطابق الیکشن کمیشن کی جانب سے جاری نوٹی فکیشن کے مطابق عمران خان این اے22مردان،این اے24چارسدہ،این اے31پشاور، این اے108فیصل آباد،این اے118ننکانہ، این اے 239 کورنگی اوراین اے45کرم سے کامیاب قرار پائے ہیں۔
اس سے قبل آج الیکشن کمیشن نے چئرمین پی ٹی آئی عمران خان کی قومی اسمبلی کے ضمنی انتخابات میں 7 حلقوں سے کامیابی کا نوٹی فکیشن جاری کرنے کا حکم دیا تھا۔
یہ بھی پڑھیں: اسپیکر قومی اسمبلی نے پی ٹی آئی اراکین کے استعفے منظور کرنے کی وجہ بتا دی
ذرائع الیکشن کمیشن کے مطابق عمران خان صرف ایک نشست رکھ سکیں گے باقی نشستیں انہیں خالی کرنا ہونگی،سب سےآخرمیں جس نشست پرکاغذات جمع کرائےگئے وہ عمران خان کی ہوگی۔
ذرائع الیکشن کمیشن کے مطابق الیکشن ایکٹ کے مطابق باقی چھ نشستیں خالی تصورکی جائیں گی،خالی نشستوں پرضمنی انتخاب کاشیڈول جاری کیاجائےگا۔
الیکشن کمیشن کے ذرائع کا کہنا تھا کہ نشستیں چھوڑنےسےمتعلق تیس دن کےاندرالیکشن کمیشن کوآگاہ کیاجائیگا،عمران خان الیکشن کمیشن کو آگاہ نہیں کرتےتوالیکشن کمیشن خود کارروائی کریگا۔
یاد رہے الیکشن کمیشن نے عمران خان کی جانب سے اخراجات کی تفصیلات جمع نہ کرنے پر نوٹس لیا تھا اور انتخابی اخراجات سے متعلق 20 دسمبر کو فیصلہ محفوظ کیا تھا۔
یہ بات قابل ذکر ہے کہ عمران خان نے قومی اسمبلی کے 6 حلقوں میں بیک وقت الیکشن جیت کر اپنا ہی 5 حلقے جیتنے کا ریکارڈ بھی توڑا ہے۔
یہ بھی اطلاعات ہیں کہ اسپیکر قومی اسمبلی کی جانب سے ڈی نوٹیفائی کئے گئے 35 ارکان قومی اسمبلی کی نشستوں پر بھی عمران خان نے حصہ لینے کا فیصلہ کیا ہے۔
