اسٹار آل راؤنڈر و سابق کپتان شاہد خان آفریدی کا بابر اعظم کی کپتانی اور تینوں فارمیٹ کے لیے الگ کپتان سے متعلق بیان سامنے آگیا۔
قومی ٹیم کے سابق کپتان شاہد آفریدی کا کہنا ہے کہ ’بابر اعظم کو اپنی کپتانی میں بہتری لانے کی ضرورت ہے، واضح رہے کہ اس سے قبل انہوں نے بابر اعظم کو کپتانی سے ہٹانے کی مخالفت بھی کی تھی۔
شاہد آفریدی نے کہا کہ تینوں فارمیٹ کے لیے الگ کپتان کی حمایت میں نہیں ہوں۔
گزشتہ روز قومی ٹیم کے عبوری چیف سلیکٹر شاہد خان آفریدی نے مصروفیات کے باعث پی سی بی سلیکشن کمیٹی سے معذرت کرلی تھی۔
یہ پڑھیں: شاہد آفریدی نے پی سی بی سلیکشن کمیٹی سے معذرت کرلی
ان کا کہنا تھا کہ مصروفیات کے باعث پی سی بی میں ذمہ داریاں نہیں نبھا سکوں گا، انڈر 19 کرکٹ کے لیے میری خدمات حاضر ہیں۔
شاہد آفریدی کا کہنا تھا کہ ملک میں کوچز ہیں ان کی خدمات حاصل کی جاسکتی ہیں۔ یاد رہے کہ شاہد آفریدی کو نیوزی لینڈ کے خلاف ہوم سیریز کے لیے عبوری سلیکشن کمیٹی کا چیئرمین مقرر کیا گیا تھا۔
یاد رہے کہ پاکستان اور نیوزی لینڈ کے درمیان سیریز 1-1 سے برابر رہی تھی جبکہ ون ڈے سیریز مہمان ٹیم نے 2-1 سے اپنی نام کی تھی۔
