لاہور: اسکول تشدد کیس میں ڈپٹی کمشنر لاہور محمد علی نے نجی اسکول کی رجسٹریشن معطل کر دی۔
تفصیلات کے مطابق لاہور کے ایک نجی اسکول میں طالبات کی جانب سے اپنی کلاس فیلو طالبہ پر تشدد کے واقعے میں ڈی سی لاہور محمد علی نے اسکول کی رجسٹریشن معطل کر دی ہے۔
سی ای او ایجوکیشن کو ہدایت جاری کی گئی ہے کہ رجسٹریشن معطلی کے دوران وہ اسکول کے امور دیکھیں، اسکول انتظامیہ کو بھی اگلی سماعت پر انکوائری رپورٹ کی سفارشات کی بابت اپنا جواب جمع کروانے کی ہدایت کی گئی ہے۔
اسکول معطلی کا فیصلہ ڈی سی لاہور محمد علی نے ایجوکیشن اتھارٹی لاہور کی انکوائری رپورٹ کی سفارشات پر کیا۔
طالبہ پر تشدد: انکوائری افسران نے طالبات کے نام اسکول سے خارج کرنے کی سفارش کر دی
سماعت کے لیے نجی اسکول اسکارڈیل کے مالک جنرل زاہد علی اکبر اور اسکول پرنسپل رومولڈ ڈیلٹا پیش ہوئے، جب کہ طالبات کے والدین نے کوئی تحریری جواب جمع نہیں کروایا، جس پر والدین کو اگلی سماعت پر اپنا تحریری جواب جمع کروانے کی ہدایت کی گئی ہے۔
سی ای او ایجوکیشن کو ڈی سی نے ہدایت کی کہ طالبات کے والدین کو نوٹس جاری کیا جائے۔
