اسلام آباد: ڈریپ نے لوکل فارما کمپنی کی تیار کردہ فولک ایسڈ اور آئرن کی گولیاں غیر معیاری قرار دیتے ہوئے الرٹ جاری کر دیا۔
تفصیلات کے مطابق ڈرگ ریگولیٹری اتھارٹی پاکستان نے مقامی دوا ساز کمپنی کی تیار کردہ فولک ایسڈ اور آئرن کی گولیوں کو غیر معیاری قرار دیتے ہوئے مارکیٹ سے اٹھانے کی ہدایت کر دی۔
ڈریپ نے شہریوں سے دونوں گولیوں کا استعمال روکنے کی درخواست کی ہے۔
ڈرگ ریگولیٹری اتھارٹی کی جانب سے شہریوں، ڈاکٹرز، فارمیسیوں اور اسپتالوں کو الرٹ جاری کیا گیا ہے، جس میں کہا گیا ہے کہ رسالپور میں واقع مقامی دوا ساز کمپنی کی تیار کردہ فولک ایسڈ، آئرن گولی کا بیچ غیر معیاری ہے۔
ڈریپ الرٹ کے مطابق آئرن کی گولی 100 ایم جی اور فولک ایسڈ 0.35 ایم جی کا بیچ نمبر 2781 غیر معیاری ہے۔
الرٹ میں فارما کمپنیوں کو دونوں گولیوں کا اسٹاک مارکیٹ سے فوری اٹھانے جب کہ ادویات کے ڈسٹری بیوٹرز اور فارمیسیوں کو دونوں ادویات کی ترسیل اور فروخت فوری روکنے کی ہدایت کی گئی ہے۔
ڈرگ ریگولیٹری اتھارٹی پاکستان کی جانب سے صوبائی ٹیموں کو دونوں ادویات کی خرید و فروخت روکنے کے لیے میڈیسن مارکیٹس کی سرویلنس بڑھانے کی بھی ہدایت کی گئی ہے۔
