کراچی: پاکستان قومی مومنٹ ( ایم کیو ایم) نے ڈیجیٹل میڈیا کی ورک فورس بنانے کا فیصلہ کیا ہے۔
اے آر وائی نیوز کے مطابق ایم کیو ایم نے ڈیجیٹل میڈیا کی ورک فورس بنانے کا فیصلہ کرتے ہوئے کارکنان، ذمے داران ، قیادت کو ڈیجیٹل ایم کیو ایم پروگرام میں انرول ہونے کی ہدایت کی ہے۔
ایم کیو ایم پاکستان کے کنوینر خالد مقبول صدیقی نے کہا کہ کارکنان، ذمے داران، پارلیمنٹرین اور اعلی قیادت خود کو رجسٹر کراکر سوشل میڈیا کی ورک فورس بنیں۔
ڈیجیٹل میڈیا کی ورک فورس میں خالد مقبول صدیقی، فاروق ستار ، مصطفی کمال، امین الحق نے بھی خود کو رجسٹرڈ کرا لیا ہے۔
خالد مقبول صدیقی نے کہا کہ ڈیجیٹل ایم کیو ایم کے ذریعے 12 فروری کے دھرنے، متنازعہ حلقہ بندیوں، ووٹر لسٹوں کے مسائل اور حکومتی اقدامات اور مسائل کو اجاگر کیا جائے، ڈیجیٹل میڈیا کے ذریعے نئی مردم شماری کے حوالے سے خود کو شمار کرانے کی بھی مہم چلائی جائے گی۔
مصطفی کمال نے کارکنان کو ہدایت کی کہ سب ڈیجیٹل ایم کیو ایم پروگرام سے جڑیں، انہوں نے کہا کہ مخالفین کا جھوٹ اس لیے بک رہا ہے کیونکہ ہمارا سچ سامنے نہیں آرہا۔
