بیجنگ : چین نے امریکہ سے غبارے کا ملبہ واپس کرنے کا مطالبہ کر دیا تاہم امریکا نے ملبہ واپس کرنے سے انکار کر دیا ہے۔
تفصیلات کے مطابق چینی دفترِ خارجہ کی جانب سے بیان میں امریکا سے غبارے کا ملبہ واپس کرنے کا مطالبہ کردیا جو اس نے گزشتہ ہفتے کے آخر میں اپنی سرزمین پر گرایا تھا۔
چینی دفترِ خارجہ کا کہنا تھا کہ غبارے کو مار گرانے کی شدید مذمت کرتے ہیں، ‘یہ غبارہ امریکہ کا نہیں ہے، یہ عوامی جمہوریہ چین کا ہے, چینی حکومت اپنے جائز حقوق اور مفادات کا تحفظ جاری رکھے گی۔’
چینی سفارت کار نے اس بات کا اعادہ کیا کہ غبارہ موسمیاتی مقاصد کے لیے استعمال ہو رہا تھا، اس سے امریکی قومی سلامتی کو کوئی خطرہ نہیں ہے۔
دوسری جانب امریکا نے چین کی جانب سے غبارے کا ملبہ واپس کرنے کا مطالبہ مسترد کردیا ہے اور کہا ملبہ واپس کرنے کا ارادہ نہیں رکھتے۔
قومی سلامتی کونسل کے ترجمان جان کربی نے کہا، ’’ امریکی فوج نے سطح سمندر سےغبارے کی کچھ باقیات برآمد کی ہیں اور پانی کے نیچے سے جمع کرنے کے عمل میں ہیں۔
ان کا کہنا تھا کہ ہم نے مار گرانے سے پہلے ہی غبارے کے بارے میں کافی اہم معلومات اکٹھی کر لی تھی اور ابھی تک ان معلومات کا تجزیہ کر رہے ہیں۔
یاد رہے 3 روز قبل چین کے غبارے کو امریکی طیارے نے مار گرایا تھا ، پینٹاگون نے غبارے کو جنوبی کیرولینا کے ساحل پر نشانہ بنانے کی تصدیق کی تھی۔
اس حوالے سے پینٹاگون سے جاری بیان میں کہا گیا تھا کہ جاسوس غبارہ چین کی ناقابل قبول خلاف ورزی ہے۔
