اسلام آباد : وزیر خزانہ اسحاق ڈار کا کہنا ہے کہ آئی ایم ایف سے ایم ای ایف پی کا ڈرافٹ مل گیا ہے، پیر کو ورچوئل میٹنگ ہوگی۔
تفصیلات کے مطابق وزیر خزانہ اسحاق ڈار نے پریس کانفرنس کرتے ہوئے کہا کہ آئی ایم ایف مشن پاکستان کے دورے پر ہے، گزشتہ دورکےآئی ایم ایف معاہدے پر عمل کررہےہیں۔
اسحاق ڈار کا کہنا تھا کہ آئی ایم ایف کے ساتھ 10 دن تمام معاشی امورپربات چیت ہوئی ، گورنراسٹیٹ بینک اس میں شامل تھے، ہم نے معاملات طے کرلئے، وزیراعظم سے زوم میٹنگ کروائی گئی، گزشتہ روز آئی ایم ایف سے مذاکرات کا آخری دور ہوا، جو چیزیں طے کی گئیں ان سے وزیر اعظم کو آگاہ کیا گیا۔
وزیر خزانہ نے بتایا کہ آئی ایم ایف مشن سے کہا ہے تفصیلی پیپرآپ جاری کرکے جائیں گے ، آئی ایم ایف نے میمورنڈم آف اکنامک اینڈفنانشل پالیسی فراہم کردیاہے، پیر کو ہماری ورچوئل میٹنگ ہوگی۔
ان کا کہنا تھا کہ پاکستان اور آئی ایم ایف نے کئی امور پر اتفاق کیا، وزیراعظم نے بھی آئی ایم ایف کوعمل درآمد کی یقین دہانی کرائی ہے۔
اسحاق ڈار نے کہا کہ گزشتہ5سال میں معیشت کو24سے47نمبرپرلےآئے اصلاحات پاکستان کی ضرورت ہیں، بجلی اورگیس کے نقصانات کم کرنا ہماری ضرورت ہے، تمام متعلقہ اداروں اوروزارتوں نے مل کر کام کیا ہے، پاکستان آئی ایم ایف کا پروگرام مکمل کرے گا۔
وزیر خزانہ کا کہنا تھا کہ پاکستان کواس جائزےکےبعد1.2ارب ڈالرملنےکی توقع ہے، آئی ایم ایف ایگزیکٹوقسط جاری کرے گا۔
