سابق بھارتی کرکٹر اور موجودہ کمنٹیٹر آکاش چوپڑا بھی پاکستان سپر لیگ کی مقبولیت متعرف ہوگئے اور اس کی تعریفوں کے پُل باندھ دیے۔
سابق کرکٹر آکاش چوپڑا نے اس حوالے سے سماجی رابطوں کی ویب سائٹ ٹوئٹر پر اپنے ٹوئٹ میں پاکستان سپر لیگ کو دنیا کی دوسری سب سے بڑی لیگ قرار دے دیا اور کہا کہ آسٹریلیا، ویسٹ انڈیز کی لیگ پی ایس ایل سے بہت پیچھے ہیں۔
آکاش چوپڑا نے اپنے ٹویٹ میں لکھا کہ میں انڈین پریمیئر لیگ (آئی پی ایل) کے بعد پاکستان سپر لیگ (پی ایس ایل) کو دنیا کی دوسری بڑی لیگ سمجھتا ہوں۔
ان کا کہنا تھا کہ جنوبی افریقہ کی پریمیئر لیگ بھی بہت اچھی چل رہی ہے جہاں شائقین کو دلچسپ مقابلے دیکھنے کو ملے تاہم آسٹریلیا کی بگ بیش لیگ اور ویسٹ انڈیز کی کیریبیئن پریمیئر لیگ ابھی اس معیار سے بہت پیچھے ہیں۔
#SA20 was such a lovely cricketing spectacle…packed houses. Good cricket. League has the potential to be the second best T20 league after the IPL. Currently, I feel it’s the PSL. Which incidentally is starting today too. BBL-CPL lagged behind.
— Aakash Chopra (@cricketaakash) February 13, 2023
واضح رہے کہ اس سے قبل سابق بنگلہ دیشی کپتان شکیب الحسن بھی پاکستان سپر لیگ کو اپنی ملکی لیگ سے بہتر قرار دے چکے ہیں۔
گزشتہ ماہ معروف آل راؤنڈر شکیب الحسن بنگلہ دیش پریمیئر لیگ کے معیار پر بھڑک اٹھے تھے اور اپنے ایک بیان میں انہوں نے کہا تھا کہ بی پی ایل کا معیار پاکستان سپر لیگ کے کہیں کم درجے کا ہے۔
یہ بھی پڑھیں: شکیب الحسن نے بنگلہ لیگ کو کمتر قرار دیدیا، پی ایس ایل کی مدح سرائی
یاد رہے کہ پی ایس ایل دنیا میں اس قدر زیادہ مقبولیت حاصل کرچکی ہے کہ کئی انٹرنیشنل غیر ملکی کھلاڑی اپنی قومی ذمے داریوں کو بالائے طاق رکھ کر پاکستان سپر لیگ کھیلنے کو ترجیح دے رہے ہیں۔
گزشتہ دنوں انگلینڈ کے کھلاڑی ایلکس ہیلز سمیت کئی انگلش کھلاڑیوں نے بنگلہ دیش ٹور کے بجائے پی ایس ایل 8 کھیلنے کو ترجیح دی اور اپنی فرنچائز کو جوائن کرلیا۔
