اسلام آباد : نجی ہاؤسنگ سوسائٹی میں تیندوے کے گھسنے کا مقدمہ درج کرلیا ، جس میں کہا ہے کہ تیندوا گھر میں پالنے والے لوگوں کیخلاف کارروائی کی جائے۔
تفصیلات کے مطابق اسلام آباد میں سہالہ پولیس نے نجی سوسائٹی میں زیرتعمیر گھر میں تیندوے کے گھسنے کا مقدمہ نامعلوم شخص کے خلاف درج کر لیا، مقدمے میں اقدام قتل کی دفعات بھی شامل ہیں۔
مقدمہ تھانہ سہالہ میں پولیس کی مدعیت میں درج کیا گیا ، جس میں کہا گیا کہ تیندوا گلدار نسل کا ہے اور انتہائی خطرناک ہے، تیندوے کو کسی نے گھر میں پالا ہوا ہے جونقصان دہ اورغفلت ہے۔
تھانہ سہالہ کے علاقے ڈی ایچ اے فیز ٹو میں چیتے کا شہریوں پر حملہ۔
وقوعہ کا مقدمہ تھانہ سہالہ میں درج کرلیا گیا۔ مقدمہ نامعلوم ملزم کے خلاف دفعہ 324/289 ت پ کے تحت درج کیا گیا۔ چیتا کسی نامعلوم شخص نے گھر میں پالا ہوا تھا۔
1/2— Islamabad Police (@ICT_Police) February 17, 2023
مقدمے کے متن میں کہا ہے کہ گھر میں خطرناک جانور رکھنے والے نے عام عوام کی زندگی خطرے میں ڈالی، تیندوا گھر میں پالنے والے لوگوں کیخلاف کارروائی کی جائے۔
ملزم نے خطرناک جانور رکھ کر شہریوں کی زندگی کو خطرے میں ڈالا۔ ملزم کی تلاش جاری ہے، جلد گرفتار کرکے قانونی کارروائی کی جائے گی۔
2/2#ICTP #OPS— Islamabad Police (@ICT_Police) February 17, 2023
گزشتہ روز اسلام آباد کی نجی سوسائٹی میں واقع زیر تعمیر گھر میں تیندوے گھس گیا تھا ، زیرتعمیرگھر میں داخل ہونے سے پہلے تیندوے نے ایک شخص کو زخمی کیا جبکہ تیندوے کے حملے سے دو سکیورٹی گارڈ بھی زخمی ہوئی۔
اطلاع ملنے پر اسلام آباد وائلڈ لائف اور پنجاب وائلڈ لائف سمیت ریسکیو کے اہلکار بھی پہنچے، تاہم کئی گھنٹوں کی کوششوں کے بعد تیندوے کو زندہ پکڑ لیا گیا تھا۔