دادو : اندرون سندھ کے شہر دادو میں شوہر نے بیوی کو قتل کرکے خود کو بھی گولی مارلی، مقتولہ محکمہ پولیس میں بطور کانسٹیبل تعینات تھی۔
تفصیلات کے مطابق دادو کے ایکسائز آفس کے قریب افسوسناک واقعہ پیش آیا ہے جس میں شوہر نے اپنی بیوی جو لیڈیز پولیس اہلکار تھی کو قتل کرکے خودکشی کرلی۔
اس حوالے سے پولیس حکام کا کہنا ہے کہ واقعے کی اطلاع ملتے ہیں پولیس جائے وقوعہ پر پہنچ گئی، دونوں لاشوں کو ضابطے کی کارروائی کیلئے ڈی ایچ کیو اسپتال منتقل کردیا گیا ہے۔
ایس ایس پی دادو عبدالخالق پیرزادہ بھی جائے وقوعہ پر پہنچے اور ابتدائی تحقیقات سے آگاہی حاصل کی، دادو پولیس کے مطابق واقعہ گھریلو معاملے پر پیش آیا ہے تاہم کوئی واضھ بات سامنے نہیں آسکی دیگر پہلوؤں سے بھی مزید تفتیش کی جائے گی۔
مزید پڑھیں : شوہر نے بیوی کو قتل کرکے لاش گھرمیں دفن کردی
قبل ازیں رواں ماہ اندرون سندھ کے شہر خیرپور میں شوہر نے بیوی کو قتل کرکے لاش گھر میں دفن کردی تھی۔
خیرپور کے علاقے نارو میں گھریلو رنجش پر شوہر نے بیوی شاہانہ لوند کو قتل کیا اور لاش گھر میں دفن کرکے فرار ہوگیا پولیس نے ملزم کے بھائی کی نشاندہی پر لاش برآمد کرکے ملزم کو گرفتار کرلیا۔
