پاکستان ویمنز کرکٹ ٹیم کی آل راؤنڈر ندا ڈار ٹی 20 میں سب سے زیادہ وکٹیں حاصل کرنے والی بولر بن گئیں، انہوں نے 129 ٹی 20 میچز میں 125 وکٹیں حاصل کی ہیں۔
پاکستان ویمنز کرکٹ ٹیم کی آل راؤنڈر ندا ڈار ٹی 20 کرکٹ میں سب سے زیادہ وکٹیں حاصل کرنے والی بولر بن گئی ہیں۔
ندا ڈار نے یہ اعزاز اتوار کو آئی سی سی ویمنز ٹی 20 ورلڈ کپ کے میچ میں ویسٹ انڈیز کے خلاف 2 وکٹیں حاصل کر کے اپنے نام کیا۔
36 سالہ آل راؤنڈر نے 129 ٹی 20 میچز کھیل کر 125 وکٹیں حاصل کر لی ہیں جس کے بعد وہ ویسٹ انڈیز کی بولر انیسہ محمد کے ساتھ ویمنز ٹی 20 انٹرنیشنل کرکٹ میں سب سے زیادہ وکٹیں لینے والی مشترکہ بولر بن گئی ہیں۔
ندا ڈار جنوبی افریقہ میں جاری ویمنز ٹی 20 ورلڈ کپ میں اب تک 3 میچز کھیل کر 4 وکٹیں حاصل کر چکی ہیں۔
ویمنز ٹی 20 انٹرنیشنل کرکٹ میں ندا ڈار اور انیسہ محمد کے ساتھ آسٹریلیا کی میگن شوٹ اور ایلیس پیری 122، 122 وکٹیں حاصل کر کے تیسرے اور چوتھے نمبر پر ہیں۔
گوجرانوالہ سے تعلق رکھنے والی ندا ڈار گزشتہ 13 برسوں سے پاکستان ویمنز ٹیم کا مستقل حصہ ہیں۔
انہوں نے ستمبر 2010 میں ویسٹ انڈیز میں سری لنکا کے خلاف اپنا ٹی 20 ڈیبیو کیا تھا جس کے بعد وہ 129 ٹی 20 مقابلوں میں 125 وکٹیں اور 16 سو 76 رنز بنا چکی ہیں۔
ندا ڈار ٹی 20 میچز میں پاکستان کی جانب سے تیز ترین 100 وکٹیں لینے والی بھی پہلی کھلاڑی تھیں۔
لیڈی بوم بوم کے نام سے مشہور ندا ڈار نے 2021 میں پاکستان کرکٹ بورڈ (پی سی بی) کا ویمن کرکٹر آف دی ایئر کا ایوارڈ بھی جیتا تھا، اسی طرح انہوں نے رواں سال آئی سی سی ویمنز ٹی 20 ٹیم آف دی ایئر میں بھی جگہ بنائی تھی۔
گزشتہ سال انہوں نے مختصر فارمیٹ میں عمدہ کارکردگی کا مظاہرہ کرتے ہوئے 18 کی اوسط سے 15 وکٹیں حاصل کیں۔
سال 2022 میں انہوں نے 14 ٹی 20 میچز کھیلے جن میں صرف 3 میچز ایسے تھے جب وہ کوئی وکٹ نہ حاصل کر سکیں۔
ندا ڈار نے گزشتہ سال بنگلہ دیش میں ہونے والے ویمنز ایشیا کپ میں روایتی حریف انڈیا کے خلاف 37 گیندوں پر 56 رنز بنانے کے ساتھ 23 رنز دے کر 2 وکٹیں بھی حاصل کیں جس کے باعث پاکستان نے انڈیا کو شکست دے دی تھی۔
