رائے پور: بھارت میں شادی کے دوسرے ہی دن مبینہ طور پر دلہے نے دلہن کو قتل کرکے خودکشی کرلی۔
بھارتی میڈیا رپورٹس کے مطابق ریاست چھتیس گڑھ کے ضلع رائے پور میں نوبیاہتا جوڑا گھر میں مردہ حالت میں پایا گیا جبکہ ان کے جسم پر چاقو کے وار کے نشانات موجود تھے۔
24 سالہ اسلم اور 22 سالہ کہکشاں بانو کی شادی اتوار کو ہوئی اور ان کی شادی کا استقبالیہ گزشتہ رات ہونا تھا۔
اہلخانہ نے پولیس کو بتایا کہ دلہا اور دلہن استقبالیہ کی تیاری کررہے تھے کہ اس دوران دلہے کی والدہ جھگڑے کی آواز سن کر پہنچیں تو دروازہ بند تھا جب کوئی جواب نہ آنے پر گھر والوں نے کھڑکی سے دیکھا تو دونوں کی خون میں لت پت لاشیں پڑی ہوئی تھی۔
گھر والوں کی جانب سے واقعے کی اطلاع پولیس کو دی گئی، پولیس نے دروازہ توڑ کر لاشوں کو نکالا اور پوسٹ مارٹم کے لیے اسپتال منتقل کردیا۔
پولیس کا کہنا ہے کہ آلہ قتل برآمد کرلیا گیا ہے، ابتدائی طور پر لگتا ہے کہ جوڑے کے درمیان جھگڑا ہوا ہے شوہر نے بیوی کو قتل کرنے کے بعد خودکشی کی ہے، واقعے کی مزید تحقیقات جاری ہیں۔
