اسلام آباد: ڈسٹرکٹ اینڈ سیشن کورٹس اسلام آباد نے توشہ خانہ اور الیکشن کمیشن کی جانب سے فوجداری کارروائی کے کیس میں عمران خان کے ناقابلِ ضمانت وارنٹ گرفتاری جاری کرنے کا تفصیلی فیصلہ جاری کر دیا۔
تفصیلات کے مطابق ایڈیشنل سیشن جج ظفر اقبال نے پی ٹی آئی چیئرمین کے وارنٹ گرفتاری کا تفصیلی فیصلہ جاری کر دیا، جس میں انھوں نے کہا کہ عمران خان توشہ خانہ کیس میں متعدد بار عدالتی پیشی پر غیر حاضر رہے۔
تفصیلی فیصلہ میں لکھا گیا ہے کہ عمران خان کی دی گئی درخواست کے مطابق وہ جوڈیشل کمپلینٹ میں پیشی کے باعث کچہری پیش نہیں ہو سکتے، اس سے صاف ظاہر ہو رہا کہ عمران خان عدالتی پیشیوں کو اپنی ترجیحات کے مطابق رکھ رہے، توشہ خانہ کیس عمران خان کی ترجیحات میں شامل نہیں ہے۔
تفصیلی فیصلے کے مطابق عمران خان ضلعی کچہری سے چند منٹوں کی دوری پر تھے، لیکن وہ آخری سماعت کے عدالتی اوقات کے اندر بھی پیش نہیں ہوئے۔
عدالت نے فیصلے میں کہا کہ عمران خان کی درخواست قابل قبول نہیں ہے، اس لیے درخواست مسترد کی جاتی ہے، اور ان کے ناقابلِ ضمانت وارنٹ گرفتاری جاری کیے جائیں۔
تفصیلی فیصلے میں کہا گیا کہ عمران خان کو گرفتار کر کے 7 مارچ کو عدالت میں پیش کیا جائے، اور ان کی 7 مارچ کو عدالتی حاضری یقینی بنائی جائے۔
