اسلام آباد : انسدادِ دہشت گردی عدالت کے جج نے عمران خان کی جوڈیشل کمپلیکس آمد پر ریمارکس میں کہا کہ مثالیں برطانیہ کی دیتے ہیں عدالت کا احترام نہیں کرتے، اپنے ساتھ غنڈے اور بدمعاش بھی کمرہ عدالت میں لے آتے ہیں۔
تفصیلات کے مطابق انسدادِ دہشت گردی عدالت میں عمران خان کی گزشتہ جوڈیشل کمپلیکس آمد کا ذکر ہوا ، دورانِ سماعت جج راجہ ناصر عباس نے عمران خان کی گزشتہ پیشی پر اہم ریمارکس دیئے۔
جج نے برہمی اظہار کرتے ہوئے کہا اس دن آئے تھے اور اپنے ساتھ ڈھائی ہزار بندہ بھی کمرہ عدالت لے آئے تھے، برطانیہ کی مثالیں دیتےہیں اور خود عدالت کا احترام نہیں کرتے۔
جج راجہ ناصر عباس کا کہنا تھا کہ عدالتی پیشی کےدوران عدالت کا احترام نہیں کیاگیاتھا، اپنے ساتھ غنڈے ،بدمعاش بھی کمرہ عدالت میں لے آتے ہیں، ایک سال کی پیشی پر آئے تھے اور اپنے ساتھ 2 سال کی پیشیاں ساتھ لے کر چلے گئے۔
انسدادِ دہشت گردی عدالت کے جج نے کہا کہ اب ایک سال مزید مجھے عدالتی سماعتوں میں مصروف رکھیں گے، میرے پاس اس معاملے کی تمام سی سی ٹی وی فوٹیج بھی موجود ہے۔
خیال رہے عمران خان 28 فروری کو اےٹی سی میں تھانہ سنگجانی میں درخواست ضمانت پر حاضری لگانے آئے تھے، اس موقع پر جوڈیشل کمپلیکس میں توڑ پھوڑ کے باعث عمران خان کے خلاف تھانہ رمنا میں مقدمہ درج ہوا تھا۔
