ریاض : سعودی حکومت نے ماہ رمضان کے ایام میں مساجد کیلئے ضروری انتظامات کے احکامات جاری کیے ہیں، جن کی خلاف ورزی پر تادیبی کارروائی کی جائے گی۔
اس حوالے سے سعودی وزیر اسلامی امور و دعوت و رہنمائی ڈاکٹر عبداللطیف آل شیخ نے کہا ہے کہ رمضان المبارک کے دوران مساجد میں عطیات جمع کرنے اور نماز کے مناظر نشر کرنے کے لیے کیمروں کے استعمال پر پابندی عائد ہوگی۔
تحریری حکم نامے میں کہا گیا ہے کہ مساجد کے آئمہ اور مؤذن حضرات ڈیوٹی کی مکمل پابندی کریں۔ انتہائی ضرورت کے علاوہ کسی حالت میں رمضان کے دوران ڈیوٹی سے غیرحاضرنہ ہوں۔ غیر حاضری کی صورت میں امامت اور اذان کے لیے متبادل انتظام کریں اور مساجد میں اذان ام القری کیلنڈر میں مقررہ وقت پر دی جائے، عشا کی اذان مقررہ وقت پر ہی دی جائے۔
سعودی وزیر اسلامی امور نے یہ بھی ہدایت کی کہ اذان کے بعد تکبیر کے دورانیہ کی پابندی کی جائے، اس کے علاوہ اعتکاف کے لیے اجازت نامے امام مسجد جاری کریں گے اور وہی اس بات کے ذمہ دار ہوں گے کہ اعتکاف کرنے والے کوئی خلاف قانون کام نہ کریں۔ اعتکاف کرنے والوں کی نجی معلومات کا اندراج امام کی ذمہ داری ہوگی۔
بیان میں مزید کہا گیا کہ افطار کرانے سمیت کسی بھی مقصد سے عطیات نہ جمع کیے جائیں۔ افطار دستر خوان کے سلسلے میں مقررہ ضوابط کی پابندی کریں، افطار دسترخوان کے لیے خیمے لگانے یا عارضی کمرے قائم کرنے کی اجازت نہیں ہوگی۔
