مہاراشٹر: بھارتی ریاست مہاراشٹر کے ایک علاقے میں سڑک پر زیر زمین پائپ لائن اچانک پھٹنے سے اسکوٹی پر جانے والی خاتون گر کر زخمی ہو گئی۔
تفصیلات کے مطابق ریاست مہاراشٹر کے ایوت محل شہر میں پانی کی سپلائی کی پرانی زیر زمین پائپ لائن اچانک پھٹ گئی، پائپ لائن میں پانی کا پریشر اتنا تیز تھا کہ سڑک کو توڑ کر پانی کا تیز فوارہ نکلنا شروع ہو گیا۔
پائپ لائن پھٹنے کا سی سی ٹی وی فوٹیج منظر عام پر آ گیا ہے، جس کو دیکھ کر ایسا لگتا ہے جیسے کوئی دھماکا ہوا ہو، پانی کے پریشر سے سڑک کا ٹکڑا بھی اکھڑ گیا اور اس دوران اسکوٹی پر جانے والی ایک لڑکی گر کر زخمی ہو گئی۔
معلوم ہوا ہے کہ جس سڑک پر یہ حادثہ پیش آیا ہے اسی راستے پر اسکول اور کالج واقع ہیں، مہاراشٹر کے وزیر سنجے راٹھور کا گھر بھی قریب میں ہی واقع ہے، اگرچہ اس راستے پر ہر وقت بھاری ٹریفک رہتی ہے تاہم پائپ لائن پھٹنے کے وقت سڑک پر بھیڑ نہیں تھی۔
#maharashtra #pipeline#CCTV #BREAKING
The pipe burst and the road was washed away, the woman fell from the moving scooty in the water. This is the case of Maharashtra. pic.twitter.com/rEpPS5Czv5— Kaustuva Ranjan Gupta (@GuptaKaustuva) March 5, 2023
واقعے کا سی سی ٹی وی فوٹیج سوشل میڈیا پر وائرل ہو گیا ہے، سوشل میڈیا صارفین نے مہاراشٹر لائف اتھارٹی کی بدانتظامی پر ناراضگی کا اظہار کیا۔
بتایا جا رہا ہے کہ یہ پائپ لائن 1972 میں بچھائی گئی تھی جو کافی خستہ حال تھی، اس لیے پانی کے دباؤ کی وجہ سے پھٹ گئی۔
